Расея страціла больш за 30% сваёй баяздольнасці з пачатку вайны ва Украіне, заявіў камандуючы брытанскімі ўзброенымі сіламі Энтані Радакін. Пра гэта паведамляе Бі-Бі-Сі.
Паводле ягоных словаў, каля 50 тысяч расейскіх вайскоўцаў былі забітыя ці атрымалі раненні. Акрамя таго, з пачатку вайны было знішчана 1700 расейскіх танкаў, каля чатырох тысяч бронемашын былі выведзены са строю.
Усё гэта дае Украіне ўпэўненасць у тым, што яна зможа выйграць вайну, мяркуе Радакін.
«Яны [украінцы] вельмі дакладна настроены на тое, каб вярнуць усю сваю тэрыторыю на ўмовах Украіны», – сказаў ён.
Апошні раз Мінабароны Расеі паведамляла пра страты расейскай арміі 25 сакавіка: тады ведамства прызнала, што загінуў 1351 вайсковец і яшчэ 3825 атрымалі раненні.
У Генеральным штабе Збройных сілаў Украіны 17 ліпеня паведамілі, што з пачатку канфлікту Расея страціла каля 38 300 чалавек.
Глеб Нержын belsat.eu