Гомельскі абласны суд 17 чэрвеня вынес прысуд па крымінальнай справе Зміцера Канеўскага за каментар з заклікамі да гвалту ў дачыненні да міліцыянтаў і іх сем’яў (арт. 130 КК – наўмысныя дзеянні, скіраваныя на распальванне расавай, рэлігійнай, сацыяльнай і іншай варожасці), паведамляе Праваабарончы цэнтр «Вясна».
Справу разглядаў суддзя Руслан Царук.
Зміцеру 26 гадоў, ён – сын палітзняволенай Таццяны Канеўскай. Маладзёна прызналі вінаватым у размяшчэнні ў тэлеграм-канале «Гомель Савецкі 97» каментара з заклікам да гвалту ў дачыненні да міліцыянтаў і іх сем’яў.
Зміцер тлумачыў, што каментар напісаў на эмоцыях і нікога не хацеў заклікаць да гвалту, і сам яго здзяйсняць не збіраўся.
«Я на эмоцыях гэта напісаў. Агрэсія была ў дачыненні да міліцыянтаў, якія займаюцца незаконнай дзейнасцю. У прыватнасці АМАП. Перад напісаннем выпіў 0.5 гарэлкі. Я даведаўся, што амапаўцы ў Лідзе забілі майго калегу Антона Марцінкевіча, мая маці тады была ў турме, ды яшчэ і выбары былі сфальсіфікаваныя», – казаў Канеўскі на першым пасяджэнні.
Са словаў Зміцера, бацька Марцінкевіча, а таксама ягоная дзяўчына паведамілі, што Антон памёр. Следства праверыла гэты факт толькі пасля таго, як Дзмітрый настаяў, і нібыта высветлілася, што Марцінкевіч жывы. Канеўскаму з ім звязацца не дазволілі.
Пад вартай Зміцер знаходзіўся з 27 студзеня. 17 чэрвеня быў агучаны прысуд – тры гады пазбаўлення волі ў калоніі агульнага рэжыму. Дома ў гамельчука засталося малое дзіця – яму крыху больш за паўтары гады
Да шасці гадоў зняволення за нібыта ўдзел у масавых закалотах асуджаная таксама маці Зміцера Канеўскага – Таццяна Канеўская, давераная асоба Святланы Ціханоўскай.
ГГ, belsat.eu