Бел-чырвона-белы сцяг з прозвішчаў беларускіх палітвязняў, які зрабіла журналістка «Белсату» і грамадская актывістка Марыя Грыц, сёння прададуць на онлайн-аўкцыёне ebay.
Марыя Грыц стварыла сцяг з рукапіснымі імёнамі беларускіх палітвязняў – усіх, хто зазнаў палітычны пераслед, пачынаючы з 1996 года.
«Калі я пісала імёны, то дзівілася, колькі сем’яў зняволеныя. Часта бачыла ў спісе сыноў і бацькоў, ці сужэнцаў, браты былі. Ад гэтага сціскалася сэрца. Я, пасля пераезду ў Кіеў, перастала атрымліваць адказы на мае лісты, якія дасылаю палітвязням. Таму пастаралася хоць так перадаць ім праменьчык падтрымкі. Мо іх родныя пабачаць гэты сцяг і адчуюць маю з імі салідарнасць», – кажа Марыя.
Сцяг быў выстаўлены на аўкцыён 8 лютага. Стартавы кошт склаў 120 долараў. Але на гэты момант ён ужо дасягнуў 1000 долараў. У ахвочых яшчэ ёсць час зрабіць сваю стаўку. Сродкі пойдуць на падтрыманне семʼяў беларускіх палітвязняў.
На сёння за кратамі ў Беларусі застаюцца 1062 асобы, прызнаныя праваабаронцамі палітвязнямі.
ПС belsat.eu