Дзмітрый Мішакоўскі на мінулым тыдні ўчыніў спробу самагубства ў Следчым ізалятары № 1. Яму выпісвалі антыдэпрэсанты, бо ў яго пагаршаўся зрок і не было магчымасці паправіць гэта. Ды пасля спробы суіцыду яму «дапамаглі» накіраваннем у штрафны ізалятар на 10 дзён.
Праваабарончы цэнтр «Вясна» расказаў гісторыю 39-гадовага менчука Дзмітрыя Мішакоўскага, які ў чаканні суду ў СІЗА № 1 спрабаваў забіць сябе.
Яшчэ ў 2017 годзе Мішакоўскі пацярпеў з палітычных прычынаў: выйшаў на акцыю на Дзень Волі 25 сакавіка, якую сілавікі жорстка разагналі. Яго жорстка білі двойчы, пры затрыманні і ў аўтобусе, а пасля кінулі пад арышт на 5 дзён.
12 жніўня 2020 года яго затрымалі каля метро «Малінаўка» – байцы АМАП гналіся за кімсьці іншым, а схапілі яго, кінулі аўтазак, адабралі і зламалі тэлефон, адвезлі ў Маскоўскі РАУС. У аддзяленні міліцыі яго пачалі біць рукамі, нагамі, дручкамі, берцамі па галаве, не давалі падняцца. Ад удараў у яго пакрышыліся зубы. Затым ён трапіў у Цэнтр ізаляцыі правапарушальнікаў на Акрэсціна, дзе катаванні працягнуліся.
Па вызваленні Мішакоўскі падаваў заяву ў Следчы камітэт, але яму, як і сотням іншых ахвяраў гвалту сілавікоў, не адказалі і нават не запрасілі да следчага.
Праз месяц у Дзмітрыя стаў імкліва пагаршацца зрок. Выявілася, што патрэбнае адмысловае лекаванне – аперацыя за мяжой з ужываннем ствалавых клетак. У красавіку 2021 года ён атрымаў ІІ групу інваліднасці па зроку. Да таго Мішакоўскі займаўся прамысловым альпінізмам і закладкай падмуркаў, але збіраўся шукаць працу для людзей з інваліднасцю праз цэнтр занятасці.
26 красавіка 2021 года, у гадавіну Чарнобыльскай катастрофы, яго зноў затрымалі за «непадпарадкаванне», пакаралі штрафам у 87 рублёў – і сталі дапытваць пра кантакты з праваабаронцамі «Вясны» і дапамогу яму з лекаваннем і скаргамі пасля катаванняў.
У гэты час Мішакоўскі адбываў «хатнюю хімію», меўшы ранейшую судзімасць за ўдзел у бойцы. Праз пакаранне 26 красавіка супраць яго распачалі крымінальную справу за «Ухіленне ад адбывання пакарання ў выглядзе абмежавання волі», у верасні асудзілі на 2 гады абмежавання волі ў папраўчай установе адкрытага тыпу («хімія»). Гэта адбылася за дзень да таго, як адпаведны артыкул 415 прыбралі з Крымінальнага кодэксу.
У снежні 2021 года яму выставілі новае абвінавачванне: у «Рабаванні» і «Вымагальніцтве» (артыкулы 206 і 208 КК РБ). Паводле «Вясны», Мішакоўскі з сябрамі неяк паехалі да знаёмага, з якім вялі бізнес, сябры вялі «размову ў духу калектарства», а ён прыехаў забраць свае інструменты і ў той размове не ўдзельнічаў. Яшчэ адзін эпізод быў звязаны з тым, што Мішакоўскі ўзяў у заклад за штосьці мабільны тэлефон у знаёмай.
13 снежня па выстаўленні абвінавачвання Мішакоўскі парэзаў сабе вены пры следчым. Ён лічыць, што яго хочуць «зрабіць крайнім». Маці Дзмітрыя расказала, што першыя вочныя стаўкі з пацярпелымі былі на карысць Мішакоўскага, але потым пацярпелыя сталі мяняць паказанні.
Як і калі адбылася наступная спроба суіцыду, «Вясна» не паведамляе. Аднак вядома, што за наступную спробу яго пакаралі 10 соднямі штрафнога ізалятару.
АА belsat.eu