У панядзелак і аўторак па большай частцы тэрыторыі Беларусі прагназуюць моцны вецер з парывамі да 15-20 м/с, днём 17-га і ноччу 18-га – месцамі да 21-24 м/с, у асобных раёнах і да 27 м/с. Можа зноў валіць дрэвы і зрываць дахі.
На 17 і 18 студзеня ў Беларусі зноў абвясцілі «аранжавы ўзровень небяспекі» праз моцны вецер. На дадатак да ветру 17 студзеня ў многіх раёнах чакаецца галалёдзіца на дарогах.
Мінулы шторм з такім ветрам здарыўся 14 студзеня. Тады прагназавалі парывы ветру да 25 м/с, але месцамі фіксаваліся парывы да 32 м/с.
Тры чалавекі пацярпелі. У 58 раёнах краіны пацярпелі 458 населеных пунктаў: у Берасцейскай вобласці – 27, у Віцебскай – 39, Гомельскай – 20, Гарадзенскай – 74, Менскай – 178, Магілёўскай – 120.
Былі пашкоджаныя дахі 427 жылых дамоў, 66 сацыяльных і культурных аб’ектаў, 20 – вытворчых, 602 сельскагаспадарчых будынкаў.
Зафіксаваныя 170 выпадкаў падзення дрэваў, найбольш – у Менскай вобласці (78). Элементамі дахаў і дрэвамі пашкоджаныя 32 аўтамабілі. Дрэвы падалі таксама на чыгуначныя шляхі і лініі электраперадач.
А да таго пабудовам маглі моцна пашкодзіць перапады тэмператураў. Цягам содняў моцныя маразы змяняліся рэзкай адлігай. Менавіта гэта і стала адною з прычынаў абрушэння мосту ў Менску на Нямізе.
АА belsat.eu
