У Польшчы прайшла прэм’ера спектакля паводле дакументальнай п’есы Андрэя Курэйчыка

Прэм’ера спектакля паводле дакументальнай п’есы Андрэя Курэйчыка адбылася ў тэатры ім. Маджэўскай ў Легніцы.

У Польшчы адбылася сусветная прэм’ера дакументальнай п’есы, прысвечанай беларусам, якія сталі ахвярамі рэжыму Аляксандра Лукашэнкі. Тэкст, складзены драматургам Андрэем Курэйчыкам з інтэрв’ю, лістоў, судовых дакументаў і прамоваў больш за 20 герояў, паставілі ў адным з лепшых тэатраў краіны – Тэатры Маджэеўскай у Легніцы.

Фота прадастаўленае «Белсату»
Фота прадастаўленае «Белсату»

Рэжысёр Лукаш Кош стварыў палатно, якое распавядае пра беспрэцэдэнтныя рэпрэсіі, якія давялося перажыць беларускаму народу. Героямі спектакля сталі Марыя Калеснікава, Мікалай Статкевіч, Ігар Лосік, асуджаныя і затрыманыя па гучных справах «студэнтаў», «Прэс-клубу», «Тутбая», айцішнікі, бізнесмены, пенсіянеры, паэты і многія іншыя – усяго больш за 20 пранізлівых гісторый, якія трапілі ў жорны сістэмы.

«Гэтыя дваццаць гісторый прыйшлося адбіраць з больш за 700, – распавёў аб працы над п’есай Андрэй Курэйчык, – але і гэта кропля ў моры. Мы ведаем, што іх дзясяткі тысяч. Як і з «Пакрыўджанымі. Беларусь» (папярэдні праект аўтара, які быў паказаны больш за 200 разоў у 30 краінах) мы спадзяемся падняць хвалю салідарнасці з палітвязнямі тэатраў і іх публікі ў розных краінах».

Фота прадастаўленае «Белсату»
Фота прадастаўленае «Белсату»

Рэжысёр спектакля Лукаш Кош адзначыў: «Шмат для каго палітвязні прадстаўляюць нейкую агульную масу. Тэрмін, за якім не відаць канкрэтнага чалавека. Вось іх сто, дзвесце, тысячы. Наш прынцып працы над спектаклем быў іншым: кожны палітвязень – гэта асобны свет, асобны сусвет. Гэты спектакль – дэманстрацыя павагі да кожнага, хто выйшаў на гэтую барацьбу».

Адпаведна з рашэннем дырэктара тэатру Якава Гломба спектакль у падтрымку Беларусі паставілі ў самыя кароткія тэрміны.

Фота прадастаўленае «Белсату»
Фота прадастаўленае «Белсату»

Бліжэйшыя паказы пʼесы пройдуць 19, 20 і 21 лістапада. Кошт квіткоў ад 35 зл.

belsat.eu

Падпісвайся на telegram Белсату

Hавiны