Галоўнае за дзень: штурм польскай мяжы і перамовы, якія не перамовы

«Белсат» падводзіць вынікі 16 лістапада – 463-га дня сацыяльнага і палітычнага крызісу, які пачаўся ў краіне пасля выбараў прэзідэнта Беларусі.

Штурм мяжы

Польскія вайскоўцы і мігранты на кантрольна-прапускным пункце «Брузгі – Кузня» на беларуска-польскай мяжы. 15 лістапада 2021 года. Фота: Аксана Манчук / БЕЛТА/ TASS / Forum

Сітуацыя на мяжы Беларусі ды Польшчы рэзка абвастрылася апоўдні 16 лістапада. Мігранты закідвалі польскіх памежнікаў і паліцыянтаў камянямі і святлошумавымі гранатамі, тыя адказалі вадамётамі, а беларускія сілавікі не спынялі беспарадкі. Праз тры гадзіны «штурму» мігранты сышлі на месца старога лагера ў лесе. Польскі бок заяўляе, што атаку каардынавалі беларускія сілавікі. Беларуская дзяржаўная тэлевізія вяла жывую трансляцыю беспарадкаў.

Пасля абеду ў папулярным арабскамоўным Telegram-канале пра беларуска-польскую мяжу з’явіліся паведамленні па-расейску: шлюць праклёны Беларусі і яе войска, вінавацяць вайскоўцаў у катаваннях мігрантаў, выштурхванні мігрантаў на мяжу гвалтам, называюць сілавікоў «наймітамі і мафіяй», а таксама заяўляюць, што «беларускія медыі на 90 % хлуслівыя».

Беспарадкі на мяжы. Мігранты кідалі камяні, палякі ўжылі вадамёт. Адзін паліцыянт паранены

Каля 200 іракцаў, якія прыбылі ў Беларусь для пераходу мяжы з Еўрапейскім Звязам, звярнуліся ў амбасаду Іраку ў Расеі з просьбай вярнуць іх на радзіму.

200 іракцаў папрасілі амбасаду забраць іх з Беларусі

Гэта не перамовы

Ангела Мэркель і Святлана Ціханоўская. Photo: Steffen Seibert

Палітычная лідарка Святлана Ціханоўская пракаментавала тэлефонную размову, што адбылася 15 лістапада паміж выканаўцай абавязкаў канцлера Нямеччыны Ангелай Мэркель і Аляксандрам Лукашэнкам.

«Учора Еўропа на Савеце замежных справаў ЕЗ пацвердзіла адзінства з беларусамі: усе 27 міністраў пагадзіліся, што рэжым трэба спыніць. Мы знаходзімся ў пастаянным кантакце і з прадстаўнікамі Вялікай Брытаніі, Канады і ЗША. І я ведаю, што званок Мэркель не быў запрашэннем ад ЕС да дыялогу. Бо ўрад Нямеччыны працягвае падтрымліваць пяты і распрацоўваць шосты пакет санкцыяў супраць рэжыму. Таму яго спроба схаваць палітычную ізаляцыю за гэтым званком – гэта не перавернутая старонка. Гэта вырваная старонка з дзённіка двоечніка, які хоча схаваць свой правал», – заявіла Ціханоўская.

«Не запрашэнне да дыялогу». Святлана Ціханоўская пракаментавала званок Ангелы Мэркель

Размова Ангелы Мэркель з Аляксандрам Лукашэнкам стала яго прызнаннем. Пра гэта заявіў нямецкі палітык ад партыі «Зялёныя», якая мае ўвайсці ў новую кіроўную кааліцыю, Амід Нурыпур.

Палітык назваў тэлефонную размову «разбуральным сігналам». Ён зазначыў, што Еўразвяз не прызнае пераабрання Лукашэнкі ў 2020 годзе. Аднак сваім тэлефонным званком Мэркель дэ-факта прызнала яго, піша faz.de.

Нурыпур сказаў, што Еўразвяз не павінен дазволіць Лукашэнку шантажаваць сябе, але таксама заклікаў надаць гуманітарную дапамогу бежанцам, якія захраслі ў памежнай зоне.

«Разбуральны сігнал». Нямецкі дэпутат раскрытыкаваў тэлефанаванне Мэркель Лукашэнку

Тым часам Літоўскі прэзідэнт выказаўся за размову з Лукашэнкам. Гітанас Наўседа лічыць магчымым вырашыць міграцыйны крызіс на мяжы ЕЗ праз дыялог з Аляксандрам Лукашэнкам. Такую думку ён выказаў у інтэрв’ю BBC.

«Думаю, што ёсць магчымасць вырашыць крызіс, звярнуўшыся і да спадара Лукашэнкі, як толькі што гэта зрабіла Ангела Мэркель. Мы павінны гаварыць з чалавекам, які адказвае за тое, што адбываецца на мяжы»

Літоўскі прэзідэнт выказаўся за размову з Лукашэнкам

1,5 года калоніі былому міліцыянту

Асуджаны былы міліцыянт Дзмітрый Скрэтуцкі. Фота: Вясна

Сёння 36-гадовага Дзмітрыя Скрэтуцкага прызналі вінаватым паводле ч.1 арт. 342 Крымінальнага кодэкса («Арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх»), паведамляе «Вясна».

Вырак у судзе Маладзечна выносіла Іна Каханоўская.

Былы міліцыянт, а цяпер прадпрымальнік Скрэтуцкі быў затрыманы 4 жніўня 2021 года. З 12 жніўня па 12 кастрычніка 2020 года ён нібыта «заклікаў да ўдзелу ў незаконных масавых дзеяннях грамадска-палітычнага характара ў тэлеграм-каналах». Таксама мужчына, паводле абвінавачвання, сцвярджаў, што можа распазнаць міліцыянтаў, калі яму будуць дасылаць фотаздымкі.

МГМ, belsat.eu

Падпісвайся на telegram Белсату

Hавiны