Міністэрства замежных справаў Чэхіі расказала, што ўрад разгледзеў сітуацыю са студэнтамі з Украіны і Беларусі і дасць ім новую дапамогу. А з 25 кастрычніка Чэхія забароніць уезд расейцам з турыстычнымі візамі.
Паводле МЗС Чэхіі, дагэтуль у краіну маглі ўехаць толькі грамадзяне Беларусі, якія мелі там сем’і (таксама Чэхія можа даваць беларусам гуманітарныя візы). У канцы лета ўлады Чэхіі пастанавілі прадоўжыць забарону на выдачу візаў грамадзянам Беларусі, нягледзячы на просьбы Святланы Ціханоўскай. Беларускія студэнты сутыкнуліся са складанасцямі пры паступленні ў ВНУ Чэхіі, офіс Ціханоўскай быў гатовы пісаць гарантыйныя лісты студэнтам, якіх збіраюцца адлічыць.
Цяпер жа Чэхія збіраецца запрашаць беларускіх студэнтаў, якія будуць вучыцца на аснове міжнародных стыпендыяў:
«Мы хочам даць якасную еўрапейскую адукацыю тым, каго пераследуюць з палітычных прычынаў, і тым, хто поўны рашучасці змяніць цяперашнія недэмакратычныя ўмовы ў сваёй краіне», – заявіў міністр замежных справаў Чэхіі Ян Ліпаўскі.
Таксама ўрад Чэхіі скарэктаваў статус украінскіх студэнтаў, каб яны маглі паступаць у чэшскія ўніверсітэты, нават калі атрымалі часовую абарону ў іншай краіне Еўразвязу.
Алесь Наваборскі belsat.eu