Запомніце гэтае слова: трыцікале. Гэта выведзены ў XIX ст. гібрыдны род траваў, скрыжаваныя жыта і пшаніца, які выкарыстоўваюць збольшага на корм жывёле, але часам дадаюць у сухія сняданкі.
У час наведвання Навукова-практычнага цэнтру земляробства Нацыянальнай акадэміі навук пад Смалявічамі 16 жніўня Аляксандра Лукашэнку пачаставалі хлебам з трыцікале, піша БелТА. Лукашэнку спадабалася: даволі смачна.
Хлеб з трыцікале выходзіць шэрым. У склад выпечкі дадалі толькі муку і ваду, з 50 грамаў мукі можа атрымацца хлеб аб’ёмам 0,75-0,8 л.
Пакуль хлеб з трыцікале не пастаўляюць на беларускі рынак, але «навукоўцы паставілі перад сабой мэту стварыць такі гатунак, які па сваіх якасцях будзе для гэтага прыдатны». Навошта – не растлумачылі.
У час паездкі пад Смалявічы Лукашэнка прыйшоў да ўзаемавыключальных высноваў:
Трыцікале звычайна не выкарыстоўваюць для пячэння хлебу – часцей пускаюць на корм жывёле, хоць часам прадаюць у крамах «здаровай ежы» або дадаюць у сухія сняданкі.
Трыцікале вывялі ў канцы XIX стагоддзя ў Шатландыі і Нямеччыне, скрыжаваўшы жыта і пшаніцу. Плюс у тым, што ў расліне спалучаюцца ўраджайнасць і ўстойлівасць да навакольных умоваў і якасці глебы, мінус – што гібрыд стэрыльны, то бок яго трэба апрацоўваць, каб расліна дала «нашчадкаў».
Суседняя Польшча – сусветны лідар у вытворчасці трыцікале (палякі яго называюць словам «пшаньжыта»), але там яго вырошчваюць не так і шмат: 5,4 млн тонаў у 2021 годзе пры агульным зборы збожжавых у 34,5 млн тонаў.
Пячы хлеб з трыцікале цяжка нават палякам. Як пісала выданне Polki.pl, у ім «горшы» глютэн, а гэта важна ў выпечцы – трыцікале саступае пшаніцы ў «хлебапякарскай каштоўнасці». Тэхналагічнага метаду, які б дазваляў выпякаць «пшаньжытні» хлеб у вялікіх аб’ёмах, пакуль не знайшлі. Што праўда, смак такога хлебу апісваюць як вельмі добры, называюць яго вельмі карысным для здароўя.
Алесь Наваборскі belsat.eu