Ці будзе «Ціханоўская-каралева» і «Чэрчыл-прэм’ер»? Спыталі Офіс Ціханоўскай пра ідэі Пракоп’ева
Памочнік камандзіра палка «Пагоня», колішні вядомы бізнесовец Вадзім Пракоп’еў жорстка раскрытыкаваў працу Офісу Святланы Ціханоўскай і зрабіў шэраг прапановаў. Ці прыслухаюцца да яго на кангрэсе, які мяркуецца правесці ў жніўні?
«Белсат» перадаў Вадзіму Пракоп’еву пытанні наконт ягоных ідэяў, але на момант публікацыі ён не адказаў. Прадстаўнік Пракоп’ева паведаміў, што той дамовіўся на гутарку з іншым выданнем. Спыталі пра ідэі Пракоп’ева Франка Вячорку – дарадцу і кіраўніка аддзелу замежнай палітыкі Офісу Святланы Ціханоўскай, якога Пакоп’еў згадваў асабіста.
Што казаў Пракоп’еў
Вадим Прокопьев / Youtube
Другі форум дэмакратычных сілаў Беларусі прайшоў у Берліне 11–12 ліпеня. Сярод удзельнікаў не было ні прадстаўнікоў Офісу Ціханоўскай, ні прадстаўнікоў Народнага антыкрызіснага ўпраўлення (на чале якога Павел Латушка).
Адным з галоўных арганізатараў быў экс-кіраўнік Парку высокіх тэхналогіяў Валерый Цапкала, якому беларускія ўлады не далі стаць кандыдатам на прэзідэнцтва ў 2020 годзе. На форуме выступалі старшыня разагнанага ў 1996 годзе Вярхоўнага савету XIII склікання Сямён Шарэцкі, кіраўніца цэнтру «Наш дом» Вольга Карач і іншыя.
Пракоп’еў выступаў менш за паўгадзіны. Што ён казаў:
- Прапанаваў удзельнікам форуму адкінуць асабістыя амбіцыі і скласці кааліцыю. Пад выніковай рэзалюцыяй форуму подпісу Пракоп’ева няма.
- Выказаў спадзеў на новы «экстраны форум» з удзелам Офісу Ціханоўскай. Ціханоўская запрасіла яго на Кангрэс беларусаў 8–9 жніўня ў Вільні (але ходзяць чуткі, што кагосьці з ахвочых не запрасілі).
- Офісу Ціханоўскай прапанаваў схему: Ціханоўская становіцца аналагам брытанскай каралевы (сімвалам, а не лідаркаю), а справамі кіруе «беларускі Чэрчыл» (імя якога Пракоп’еў не назваў – некаторыя спрабуюць адгадаць, каго ж ён меў на ўвазе).
- Казаў пра «бяду з лідарствам», адсутнасць у Ціханоўскай плану на змаганне з рэжымам Аляксандра Лукашэнкі (а Пракоп’еў не бачыць ніякага шляху перамогі акрамя «ваенна-палітычнага»), пра «пасіўнасць і бездапаможнасць» Офісу Ціханоўскай і пра тое, што «Франак Вячорка змагаецца з іншымі апазіцыянерамі», таму яго трэба паслаць амбасадарам як мага далей.
- Расказаў, як спрабаваў дзеяць асобна ад Офісу Ціханоўскай, каб зрэалізаваць свае ідэі і сказаць «Святлана, мы ўсё зрабілі, дарабіце на міжнароднай арэне», але «ўпёрся ў сцяну» ва Украіне: маўляў, украінскія ўлады збіраюцца размаўляць з рэжымам Лукашэнкі, бо ён кантралюе тэрыторыю Беларусі. Пракоп’еў лічыць, што Беларусі неабходная нацыянальна-вызваленчая армія пры падтрыманні замежных супольнікаў, ды калі ён спрабаваў размаўляць з «прадстаўнікамі Лондану і прадстаўнікамі Варшавы», яго пыталі, «кім вы даводзіцеся Святлане Ціханоўскай».
Што на гэта адказаў Офіс Ціханоўскай
Спыталі Франка Вячорку пра тое, ці кангрэс у Вільні будзе развязкам для тых, каму не падабаецца праца Офісу Ціханоўскай, і ці ўсіх ахвочых туды запрасілі. Вячорка тлумачыць:
«Гэта кангрэс прапанавала правесці Святлана ў адказ на запыт нашых ініцыятываў. За апошнія два гады мы сапраўды губляем сувязь з беларусамі, якія ўнутры краіны, і адной з галоўных ідэяў кангрэсу было сфакусавацца менавіта на праблемах беларусаў у Беларусі.
Спіс запрошаных на сёння – больш за 300 чалавек. Усе запрашэнні накіроўвае асабіста Святлана, а не Офіс. Сярод запрошаных – палітыкі, праваабаронцы, блогеры, медыяасобы. Запрасілі і каліноўцаў [полк Каліноўскага – беларускія добраахвотнікі, якія ваююць у складзе Збройных сілаў Украіны], і байполаўцаў [BYPOl – аб’яднанне былых сілавікоў Беларусі, якія выступаюць супраць Лукашэнкі], і Пракоп’ева, і Вольгу Карач. Будзе адкрытая рэгістрацыя для прадстаўнікоў грамадзянскай супольнасці паводле квоты: 1 прадстаўнік ад арганізацыі ці суполкі дыяспары.
Нікому не адмовілі, таму што яшчэ нават запрашэнняў не рассылалі».
Як Офіс адрэагаваў на ідэю з «Ціханоўскай-каралевай» і «Чэрчылам-прэм’ерам»? Такі варыянт можа разглядацца?
«Нармальна адрэагаваў, – кажа Вячорка пра Офіс Ціханоўскай. – Гэта ж адкрытая дыскусія, свабода слова. Увогуле, у Офіс прыходзяць з рознымі ідэямі, многія з ідэяў пайшлі ў работу, часам ідэі нерэлевантныя ці нерэалістычныя.
Вадзім Пракоп’еў таксама быў частым госцем у Офісе, і гэтую ідэю з каралевай і ваенным штабам агучваў раней. Святлана ж лічыць, што палітыка – гэта не пра тытулы і пасады. Гэта найперш дзеянні.
Калі Вадзім прапануе канкрэтны план, канкрэтныя прапановы ў асобах, пагодзіцца працаваць супольна з іншымі – вядома, ягоная энергія патрэбная. Але тытулы і пасады самі сабой нічога не вызначаюць – трэба працаваць. Святлана лічыць, што Кангрэс дасць магчымасць кожнаму выказацца і рэарганізаваць працу дэмакратычных сілаў».
Офіс Ціханоўскай крытыкуюць за адсутнасць плану нямірнай рэвалюцыі, за адсутнасць фармавання нацыянальна-вызваленчай арміі (пры тым Ціханоўская падтрымлівае байполаўскі план «Перамога» і згадвае рэгулярна пра полк Каліноўскага і полк «Пагоня»). Франак Вячорка кажа, што гэта якраз нядаўна абмяркоўвалі:
«Святлана дала задачу вынесці на Кангрэс тэму сцэнароў змены ўлады, каб была адкрытая дыскусія. Там і абмяркуем. Калі спадар Пракоп’еў пагодзіцца, ён можа стаць адным з панэлістаў у гэтым пытанні».
Што адказаць тым, хто кажа, што Офіс нібыта нічога не робіць дзеля барацьбы з рэжымам Лукашэнкі і барацьбы за вызваленне Беларусі?
«Падключайцеся да працы, – адказвае Вячорка. – Рабіце лепш. Рабіце інакш. Работы непачаты край.
Офіс сам ніколі не развяжа ўсіх пытанняў. У нас кадравы і інтэлектуальны голад пастаянна. Хаця мы адкрытыя, і нават спрабавалі адкрываць вакансіі. Але калі людзі даведваліся, што гэта праца ў Офісе, многія адмаўляліся, праз магчымыя наступствы.
У Святланы Ціханоўскай, як беларускага лідара, задачы трошкі шырэйшыя, чым у Офісу. Яна прадстаўляе беларусаў, выступае ад іхнага імя ў свеце. Аб’ядноўвае розныя сілы і ініцыятывы.
Офіс мае больш інструментальную ролю: падтрымліваць працу Святланы, але і развязваць практычныя пытанні беларусаў, як мы цяпер спрабуем развязваць міграцыйныя пытанні беларусаў ва Украіне і Еўразвязе. Робім, што можам, але нашых сілаў недастаткова, таму просім аб дапамозе».
Алесь Наваборскі belsat.eu
