«Расея нацэленая проста на знішчэнне». Лідары Італіі, Нямеччыны, Румыніі і Францыі пабывалі ў Ірпіні. ФОТА
Ірпінь – мястэчка пад Кіевам. Горад, у адрозненне ад суседняй Бучы, толькі часткова быў пад расейскай акупацыяй, але расейскія войскі спрабавалі ўзяць увесь Ірпінь і дзеля гэтага абстрэльвалі жылыя дамы. Пасля візіту ў Кіеў кіраўнікі Італіі, Нямеччыны, Румыніі і Францыі паглядзелі на разбурэнні ў мястэчку.
Прэзідэнт Украіны Уладзімір Зяленскі сустрэўся з прэзідэнтам Францыі Эманюэлем Макронам, канцлерам Нямеччыны Оляфам Шольцам, прэм’ер-міністрам Італіі Мар’ё Драгі і прэзідэнтам Румыніі Клаўсам Ёганісам, якія прыбылі 16 чэрвеня ў Кіеў. Пасля дэлегацыя паглядзела на разбурэнні ў Ірпіні – прадмесці Кіева, побач з Бучай. Раней у Ірпінь запрашалі прэм’ера Канады, першую лэдзі Злучаных Штатаў і іншых высокіх гасцей.
Канцлер Нямеччыны Оляф Шольц, як піша «Bild», так выказаўся пра пабачанае ў напаўзруйнаваным Ірпіні:
«Гэта шмат што кажа пра агрэсіўную вайну Расеі, якая проста мае на мэце знішчэнне. Мы мусім памятаць пра гэта ўсё, прымаючы рашэнні».
Шольц таксама адзначыў, што разбурэнні ад вайны – гэта жахліва, але яшчэ горш, «калі бачыш, наколькі жахлівы і бессэнсоўны гэты гвалт».
Паводле мэра Ірпіня, у горадзе за час бітваў і абстрэлаў загінулі да 300 цывільных і 50 вайскоўцаў. Да поўнамаштабнай вайны ў Ірпіні жылі каля 60 тысяч чалавек – у тым ліку нямала эмігрантаў з Беларусі. Кадры эвакуацыі мірных жыхароў Ірпіня пад абстрэламі і праз разбомбленыя масты абляцелі ўвесь свет.
Алесь Наваборскі belsat.eu
