Яшчэ ў адной вёсцы на Піншчыне ўвялі каранцін праз шаленства

Фота: pets.ru

Каранцінныя абмежаванні ўвялі ў вёсцы Беразцы Парахонскага сельсавету, а да таго – у вёсцы Ласіцк Пінскага раёну, паведамляе Пінскі райвыканкам.

У вёсцы Беразцы на адным з падворкаў лісіца накінулася на сабаку. Гаспадар віламі закалоў звера, у якога пасля правядзення ветэрынарнай экспертызы знайшлі шаленства. Гэта стала нагодаю, каб Пінскі райвыканкам абвесціў Беразцы небяспечнаю зонаю праз шаленства жывёлы і ўвёў каранцін на два месяцы. У далейшым, зыходзячы з наяўнага становішча, раённая ветэрынарная служба пастановіць, зняць ці падоўжыць абмежаванні.

Дарэчы, здароўю сабакі нічога не пагражае, ён быў прышчэплены ад шаленства. Раённая ветслужба настойліва рэкамендуе прышчапіць жывёлінаў, падазраваных у шаленстве, з абавязковай ізаляцыяй на 60 содняў, а месца іхнага перабывання дэзынфікаваць.

У пачатку красавіка ў вёсцы Ласіцк Пінскага раёну таксама ўвялі каранцін праз шаленства. Там з’явіўся агрэсіўны воўк, які нападаў на людзей. Неўзабаве ваўка застрэлілі. Высветлілася, што звер быў хворы на шаленства.

МГМ, belsat.eu

Hавiны