Яшчэ адзін студэнт затрыманы па крымінальнай справе, паведамляе праваабарончы цэнтр «Вясна». На гэты раз абвінавачванне датычыцца «стварэння экстрэмісцкага фарміравання».
Перад Днём Волі, 24 сакавіка, каля 7.40 раніцы ў інтэрнаце БДУ №2, што на Кастрычніцкай вуліцы, затрымалі 20-гадовага студэнта Арцёма Баярскага. У студэнцкіх чатах абмяркоўваліся абставіны затрымання хлопца: «Суседзяў – на падлогу і ў кайданкі, але забралі толькі Арцёма». Суд над Арцёмам прайшоў у Доме Правасуддзя, дзе яго пакаралі 25-соднявым арыштам.
Раней Арцёма Баярскага ўжо арыштоўвалі на 15 содняў за ўдзел у масавым мерапрыемстве, таму, магчыма, ён трапіў пад хвалю прывентыўных затрыманняў перад Днём Волі.
Студэнта павінны былі вызваліць 18 красавіка, але сёння стала вядома, што Арцём затрыманы ў межах крымінальнай справы па ч.1 арт. 361 КК («Стварэнне экстрэмісцкага фарміравання»). Цяпер яго ўтрымліваюць у ІЧУ.
АД, belsat.eu