Былыя супрацоўнікі сілавых структураў змогуць адвакацкую ліцэнзію паводле спрошчанай працэдуры. Дэпутаты Палаты прадстаўнікоў прынялі ў першым чытанні законапраект «Аб змяненні законаў па пытаннях адвакацкай дзейнасці», перадае БелТА.
Паводле новага закону аб адвакацкай дзейнасці ўводзіцца спрошчаны парадак стажыроўкі і здачы кваліфікацыйнага экзамену прэтэндэнтаў з ліку былых суддзяў, пракурораў і іншых работнікаў сілавых структураў.
«Гэта вядома дзве супрацьлеглыя пазіцыі: абвінавачванне і абарона, следчы і адвакат. Калі адзін бок будзе рэкамендаваць кандыдатаў на другі бок, вядома, што гэта будзе гульня ў адну браму. Не выклікае сумневу, што гэты закон палітызаваны, а мэта гэтага закону – зрабіць больш цяжкай абарону палітзняволеных», – заявіў у жывым эфіры «Белсату» сябар НАУ, чалец Каардынацыйнай рады Міхаіл Кірылюк.
З мінулага году ўлады Беларусі пазбавілі адвакацкай ліцэнзіі шэраг вядомых адвакатаў, якія займаліся абаронаю правоў палітычных зняволеных. Сярод іншых адвакацкую ліцэнзію згубілі адвакаты Марыі Калеснікавай Аляксандр Пыльчанка і Людміла Казак, адвакат журналістак «Белсату» Сяргей Зікрацкі, адвакаты Юлія Леванчук, Канстанцін Міхель, Міхаіл Кірылюк, Максім Конан.
Таксама шэраг адвакатаў самыя зʼяўляюцца фігурантамі крымінальных справаў, у прыватнасці юрысты з каманды Віктара Бабарыкі – Ілля Салей і Максім Знак.
АА belsat.eu