У берлінскім Тэатры Горкага (Gorki Theater) 20 сакавіка адбудзецца прэзентацыя кнігі палітвязня Мікалая Дзядка.
Першачаргова вечар будзе прысвечаны палітвязням Беларусі, а таксама, у сувязі з апошнімі падзеямі – вайной ва Украіне – наогул усім палітвязням, у тым ліку і расейскім.
З 2010 па 2015 год палітвязень Мікалай Дзядок пісаў нарысы аб жыцці ў беларускіх месцах пазбаўлення волі. У той час ён быў зняволены па палітычных матывах.
Дзядок апісвае і аналізуе паўсядзённае жыццё ў турме і ключавыя элементы беларускай пенітэнцыярнай сістэмы – аж да наўмыснага нанясення сабе цялесных пашкоджанняў як апошняй магчымасці зняволеных абараніць сваё жыццё, здароўе і годнасць.
Падрабязней пра мерапрыемства можна даведацца па спасылцы.
У 2010 годзе Дзядок быў затрыманы ў якасці падазраванага па справе аб «нападзенні на пасольства Расейскай Федэрацыі» у Менску. Калі абвінавачванне ў ягоным удзеле не атрымала дастатковых доказаў, яму двойчы працягвалі тэрмін утрымання пад вартай па новых справах. У выніку Мікола Дзядок быў абвінавачаны ва ўдзеле ў несанкцыянаванай акцыі каля Генштаба Беларусі, яму было прад’яўлена абвінавачанне па артыкуле 339 ч. 2 – «хуліганства». У траўні 2011 года яго асудзілі на чатыры з паловай гады абмежавання волі ў калоніі ўзмоцненага рэжыму.
На судзе актывіст сваю віну не прызнаў і пазней у калоніі адмовіўся падпісваць прашэнне аб памілаванні на імя прэзідэнта. У калоніі Шклова ён атрымаў больш за 10 спагнанняў за розныя надуманыя парушэнні і быў пераведзены з калоніі ў турму № 4 Магілёва.
У лістападзе 2014 года на зняволенага завялі новую крымінальную справу па арт. 411 КК РБ за «злоснае непадпарадкаванне патрабаванням адміністрацыі папраўчай установы». Яму дадалі яшчэ адзін год зняволення ў калоніі строгага рэжыму.
Пазней Дзядка неаднаразова арыштоўвалі за актывістскую дзейнасць.
Пасля прэзідэнцкіх выбараў 2020 года ён ізноў быў затрыманы супрацоўнікамі ГУБАЗіКу, пры затрыманні да яго ўжываліся катаванні. Прысуд Дзядку вынеслі ў Менскім гарадскім судзе 10 лістапада 2021 года. Яго прызналі вінаватым паводле трох артыкулаў Крымінальнага кодэксу: арт. 342, 361, і 295-3 («Актыўныя дзеянні, што груба парушаюць грамадскі парадак», «Заклікі да прычынення шкоды нацыянальнай бяспецы» і «Незаконныя дзеянні ў дачыненні прадметаў, заснаваных на выкарыстанні гаручых сумесяў») і прызначылі пакаранне ў выглядзе пяці гадоў пазбаўлення свабоды ва ўмовах агульнага рэжыму.
АД belsat.eu
