У судзе Фрунзенскага раёну Менску 16 лютага працягнулі працэс над журналісткамі «Белсату» Кацярынай Андрэевай і Дар’яй Чульцовай. Захады бяспекі на паседжанні сёння ўзмоцненыя.
Кожны, хто трапіў на суд, праходзіў праз рамкі-металашукальнікі. Іх звычайна ставяць на працэсах над анархістамі. Трапіць у судовую залу зноў здолелі не ўсе: гэта тлумачаць захадамі эпідэміялагічнай бяспекі. Аднак людзі, якія ўсё ж такі апынуліся ўнутры, кажуць, што месцаў хапае нават з улікам шахматнай рассадкі. Людзям, якія патрабуюць адчыніць дзверы залы, ахоўнік кажа: «Лядоўню ў сябе дома можаце адчыніць, зачыніць і там правяраць».
Журналісты недзяржаўных медыяў прайсці не здолелі. Затое здымачную групу ОНТ у залу пусцілі.
Нашых каляжанак Кацярыну Андрэеву і Дар’ю Чульцову вінавацяць паводле ч. 1 арт. 342 Крымінальнага кодэксу («Арганізацыя і рыхтаванне дзеянняў, што груба парушаюць грамадскі парадак»). Кацярыне Андрэевай і Дар’і Чульцовай пагражае да трох гадоў пазбаўлення волі. Справу разглядае суддзя Наталля Бугук.
ЯП belsat.eu