Справу разглядае суддзя Юлія Блізнюк, пазіцыю дзяржаўнага абвінавачвання падтрымлівае старэйшы памочнік пракурора Павел Папкоў.
Пракурор прапанаваў прыступіць да агляду рэчавых доказаў. Суддзя пагадзілася. Уключылі запіс тэлефонных размоваў Бяленскага і Савіцкага, Бяленскага і Пазняка, Бяленскога і Халатрана, якія адбываліся ўвечары 9 жніўня. Лявон у гэты час быў у штабе Бабарыкі.
Бяленскі і Савіцкі казалі пра тое, што адбывалася ў горадзе. Адзін з іх сказаў, што каля гатэлю «Беларусь» «мусароў яшчэ няма». У зале пачуліся смяшкі. Суддзя спыніла запіс і сказала, што смех у зале забаронены, папярэдзіла, што ўсе, хто смяецца, будуць выдаленыя.
Затым слухалі размову паміж Халатранам і Ганнай Дапшэвічуце 11 жніўня.
Суддзя папрасіла жонку Халатрана Яну Смалягу пакінуць залу пасяджэння. Жанчыну папрасілі выйсці, бо яна парушыла парадак: паднялася і пачала гаварыць.
У суддзе перапынак да 14:10.
Пракурор папрасіў для Лявона Халатрана два гады хіміі са скіраваннем у адмысловую ўстанову. І папрасіў не вызваляць Халатрана да таго, як прысуд набудзе законную моц. 17 лютага аб 11:45 – апошняе слова.
Лявона Халатрана затрымалі 11 жніўня 2020 года і моцна збілі. Спачатку яго абвінавацілі паводле ч. 2 арт. 293 Крымінальнага кодэксу – «Удзел у масавых беспарадках», аднак у снежні абвінавачанне перакваліфікавалі на ч. 1 арт. 342 КК – «Групавыя дзеянні, якія груба парушаюць грамадскі парадак». Сваёй віны Лявон Халатран не прызнае.
Лявон Халатран жанаты, у яго ёсць маленькі сын. Раней да крымінальнай адказнасці не прыцягваўся. Праваабарончая супольнасць Беларусі прызнала Лявона Халатрана палітвязнем.
ДР belsat.eu