Блогераў Кабанава і Пятрухіна не даставілі на суд. Раней іх выдалілі з паседжання
Сёння другое паседжанне ў справе берасцейскіх блогераў Сяргея Пятрухіна і Аляксандра Кабанава. Аднак іх у зале няма.
Справу блогераў разглядае суд Кастрычніцкага раёну Магілёва. Шмат месцаў у зале займаюць супрацоўнікі міліцыі ў цывільным, а таксама маладыя людзі, падобныя да студэнтаў. Журналістаў і прадстаўнікоў АГП пусцілі ў апошнюю чаргу. Выступіў адзін з пацярпелых, які папрасіў кампенсацыю 1500 рублёў.
Сяргея Пятрухіна і Аляксандра Кабанава сёння ў суд не даставілі, бо іх выдалілі з першага паседжання. Тады блогерам зрабілі некалькі заўвагаў, не задавальнялі іхных хадатайніцтваў. У выніку Кабанаў папрасіў:
«Праводзьце пасяджэнне без нас. Збярыце лепш тройку. А мы просім канвой адвесці нас у камеру – будзе сацыяльнае дыстанцыяванне».
Блогера з Берасця Сяргея Пятрухіна вінавацяць паводле арт. 342 («Арганізацыя або рыхтаванне масавых закалотаў»), арт. 369 («Абраза прадстаўніка ўлады») і арт 391 («Абраза суддзі») Крымінальнага кодэксу. Аляксандра Кабанава вінавацяць паводле арт. 342 («Арганізацыя або рыхтаванне масавых закалотаў»), арт. 369 («Абраза прадстаўніка ўлады»).
Вольга Васільева/ЯП belsat.eu
