{movie}Навошта нам іхняя авіябаза? (11.09.2013) |right|12442{/movie}
Першай справай, як пяецца, самалёты. Ну, а інтарэсы Беларусі ўжо пасля. Калі ў красавіку міністр абароны Расеі Сяргей Шайгу заявіў, што Крэмль плануе збудаваць авіябазу ў нашай краіне, адчувалася, што меркавання беларусаў ніхто і пытацца ня будзе. Тым болей, што афіцыйна казалася пра тое, што база мае ўмацаваць супрацьпаветраную абарону Беларусі. Праўда, ёсць адно «але»…
АЛЯКСАНДР АЛЕСІН, ВАЙСКОВЫ АГЛЯДАЛЬНІК: «…Калі ўзяць тып самалётаў, які там размяркуюць, трэба сказаць, што ён валодае збытнымі для Беларусі ўдарнымі магчымасцямі. Гэта ракетна-бомбавая нагрузка прыблізна 8 тонаў, дальнасць дзеяння – 1500 кіламетраў і магчымасць размяшчэння ракетаў дальняга радыусу дзеяння».
Як расейскія наступальныя машыны маюць умацаваць абароназдольнасць беларускага войска – не зусім зразумела. Праўда, узнікае яшчэ адзін цікавы момант: расейская база хутчэй за ўсё будзе экстэрытарыяльная. То бок дэ-юрэ гэта будзе тэрыторыя Расейскай Федэрацыі, таму ўзбраенне гэтых самалётаў можа быць розным.
АЛЯКСАНДР АЛЕСІН, ВАЙСКОВЫ АГЛЯДАЛЬНІК: «Расея на сваёй тэрыторыі можа размяшчаць што заўгодна, у тым ліку і тактычную ядравую зброю. І з кропкі гледжання міжнароднага права, ніхто не можа ёй рабіць ніякіх закідаў».
Малаімаверна, каб улады Беларусі не бачылі ў гэтым ніякай небяспекі. Адмыслоўцы сыходзяцца на думцы, што Лукашэнка, як заўсёды жыве кароткатэрміновымі перспектывамі.
АНДРЭЙ ПАРОТНІКАЎ, АНАЛІТЫК «BELARUS SECURITY BLOG»: «Для ўладаў Беларусі гэта хутчэй за ўсё з прыцэлам на 2015 год – заручыцца падтрыманнем Масквы. Падтрымкаю палітычнаю і фінансаваю, безумоўна. І гарантаваць сабе тое, што расейскія вярхі не будуць гуляць супраць дзейнага кіраўніка дзяржавы, то бок што не будзе ніякага прамаскоўскага кандыдата ў 2015 годзе».
Пакуль супраць стварэння расейскіх базаў пратэстуюць адзінкі. Грамадскія слуханні акурат мелі на мэце зацікавіць грамадства будучыняю больш далёкаю. Бо ў выпадку канфлікту Расеі з Захадам біць будуць па беларускай зямлі.
Усевалад Шлыкаў, «Аб’ектыў»