Каля гомельскага вінзаводу ўтварылася доўгая чарга грузавікоў з яблыкамі, на якую скардзяцца гараджане.
У апошнія дні ў цэнтры Гомля, каля варот вінаробнага заводу, гадзінамі стаяць дзясяткі грузавікоў. Кіроўцы чакаюць, пакуль на прадпрыемстве прымуць груз, а вязуць яны ў Гомель яблыкі, галоўную сыравіну для пладова-ягаднага віна, з усёй вобласці. Гэткая сітуацыя ўзнікае амаль штогод у жніўні-верасні.
Як расказалі кіроўцы, бывае, што да канца дня машыны так і не разгружаюць, таму некаторыя едуць дамоў, а хтосьці начуе проста каля завадской брамы. На заводзе праблемы з прыёмам тавару тлумачаць вялікім патокам грузавікоў з сыравінаю.
Гараджане скардзяцца, што аўтамабілі ствараюць нязручнасці для іншых вадзіцеляў пры руху па вуліцы Рагачоўскай.
МЯ, belsat.eu, паводле БелаПАН