У Варшаве 12-14 лістапада прайшоў сёмы фестываль беларускага кіно «Bulbamovie». Ён адбыўся пасля 5-гадовага перапынку.
Месцам правядзення фестываля стаў кінатэатр «Iluzjon» у Варшаве. Акрамя паказу фільмаў падчас фестывалю прайшлі дыскусіі і сустрэчы з рэжысёрамі і прадзюсарамі.
Усяго ў конкурснай праграме ўдзельнічала восем стужак пра актуальныя падзеі ў Беларусі:
- «Сойка» Настассі Сергіені;
- «А хто там ідзе?» Паўла Нядзведзя;
- «Пётра-крывапійца» Аляксандра Максімава;
- «Zhaba.BY» Стаса Турко;
- «09.08» Дашы Брыян;
- «Эгаісты» Дзяніса Міклашеўскага;
- «Minsk 2020» Ганны Мацкевіч;
- «Цудоўныя ўзгоркі» Алены Буяковай.
Таксама быў прадстаўлены блок кароткаметражных фільмаў маладых беларускіх рэжысёраў.
Спецыялісты Нацыянальнага кінаархіва Аўдыёвізуальнага інстытуту вырашылі адзначыць і ўзнагародзіць два фільмы, паказаныя на фестывалі.
Гэта дакументальны фільм «Цудоўныя ўзгоркі» рэжысёркі Алены Буяковай з узнагародай 3000 злотых. Фільм расказвае пра паселішча, якое хацела стварыць свой ідэальны свет.
Таксама ўзнагароду атрымаў кароткаметражны мастацкі фільм «Сойка» рэжысёркі Настассі Сергіені з узнагародай 2 000 злотых. Фільм заснаваны на рэальных падзеях, у ім расказваецца пра адзін дзень з жыцця маладой дзяўчыны з Беларусі, якая жыве ў Нью-Ёрку. У ім асвятляюцца цяжкасці, з якімі сутыкаюцца імігранты, праблемы самарэалізацыі, адзіноты і надзеі.
Фестываль беларускіх відэа і кінафільмаў «Bulbamovie» узнік у 2011 годзе. Заснавальнікам і арганізатарам кінафэсту з’яўляецца Януш Гаўрылюк, выпускнік факультэту беларускай філалогіі ў Варшаўскім універсітэце, журналіст тэлеканалу «Белсат».
