Планавы рамонт першага энергаблоку БелАЭС пачалі 25 красавіка сёлета. Улучыць яго думалі ў ліпені. Пазней тэрмін перанеслі на жнівень. Цяпер чыноўнікі не агучваюць дакладных датаў, а кажуць, што працу адновяць да канца года, піша «Зеркало».
Першы энергаблок БелАЭС плануюць запусціць да канца года. Пра гэта падчас тэлефоннай лініі заявіў намеснік міністра энергетыкі Міхаіл Міхадзюк:
«Планавы рамонт працягнулі, бо патрабуюцца дадатковыя працы для павышэння надзейнасці турбінаў. Праводзяцца дадатковыя выпрабаванні з улікам досведу эксплуатацыі аналагічнага абсталявання на іншых АЭС – у Варонежскай і Ленінградскай вобласцях. Рэактар стаіць, паліва загружанае. Рэактар пакуль заглушаны. У гэтым годзе сапраўды запусцім першы энергаблок».
11 кастрычніка міністр энергетыкі Віктар Каранкевіч заявіў, што пастаноўлена правесці «дадатковыя працы і дыягностыку электрагенеравальнага абсталявання першага блоку станцыі з улікам досведу эксплуатацыі аналагічнага абсталявання на іншых АЭС».
«Планавы рамонт» на першым энергаблоку трывае з 25 красавіка. З моманту ўключэння блоку ў энергасетку яго працу спынялі некалькі разоў на вялікія тэрміны.
Алена Аляксандрава belsat.eu
