Статыстыка ўсяго з пяці буйных медычных установаў Віцебскай вобласці паказала: за дзень выяўлялі да 1519 выпадкаў COVID-19, а гэта 81 % ад таго, што за той дзень Міністэрства аховы здароўя рапартавала пра ўсю краіну.
Ілюстрацыйная выява. Раённая больніца ў Докшыцах, Віцебская вобласць.
Фота: Белсат
Партал Zerkalo.io апублікаваў атрыманую з уласных крыніцаў статыстыку распаўсюду каронавіруса з Віцебскай гарадской цэнтральнай паліклінікі, абласных Цэнтру гігіены і эпідэміялогіі, Клінічнай інфекцыйнай лякарні, Цэнтру дэрматавенералогіі і Абласной клінічнай радзільні. Лічбы станоўчых тэстаў на COVID-19 ёсць з 25 жніўня да 5 кастрычніка.
Раней падобную статыстыку публікавалі адносна Менску.
Hавiны
«Злілі» рэальную статыстыку: у Менску да 3076 новых выпадкаў COVID-19 за дзень
2021.10.12 09:55
Што вядома з новага раскрыцця афіцыйных звестак:
- Колькасць новых выпадкаў хутка расце: у канцы жніўня выяўлялі пару сотняў хворых, у сярэдзіне верасня – паўтысячы на дзень, на пачатку кастрычніка – да 1519 новых выпадкаў. За тыдзень 30.08–5.09 выявілі 1464 выпадкі, а за тыдзень 27.09–3.10 – ужо 5312.
- Пнеўманію выявілі ў 6 % з гэтых выпадкаў. Звестак аб смяротнасці няма.
- У выходныя робяць значна менш тэстаў. Адпаведна, менш і станоўчых вынікаў.
- У дзень, калі ў толькі пяці ўстановах Віцебшчыны (а гэта далёка не ўсе медычныя ўстановы вобласці) выявілі 1519 новых выпадкаў, Міністэрства аховы здароўя рапартавала аб 1872 новых выпадках па ўсёй краіне. Калі ўявіць, што і Мінздароўя, і гэты зліў інфармацыі не хлусяць, то на Віцебшчыне ў той дзень выявілі не менш за 81 % новых выпадкаў у краіне (што малаімаверна).
- Найбольш выпадкаў выявілі ва ўзроставай групе 31–40 гадоў (у злітым масіве – 3456), крыху менш – у групах 41–50 і 51–60 гадоў (3282 і 3288). У людзей астатніх узростаў выяўлялі ўжо менш новых выпадкаў.
- Сярод хворых ёсць дзясяткі немаўлятаў і чатыры чалавекі, старэйшыя за 100 гадоў (самая старая пацыентка – 108-гадовая).
- Хварэюць і сілавікі: за 42 дні тэстаў са зліву ў накіраваных з МУС было сто чалавек са станоўчым адказам на COVID-19.
- Каронавірус выяўлялі і ў тых, хто прыходзіў на абследаванне, і ў тых, хто збіраўся за мяжу, і нават у тых, хто трапіў да медыкаў у алкагольнай коме.
Hавiны
Міністэрства аховы здароўя апублікавала мапу ўсіх пунктаў вакцынацыі ў Беларусі
2021.10.14 15:24
АА belsat.eu