Пяты пакет санкцыяў ЕЗ будзе ў лістападзе, у Беларусі новыя палітвязні. Галоўнае за 15 кастрычніка
431 дзень працягваецца палітычны крызіс у нашай краіне. Беларусы не жадаюць прызнаваць вынікі прэзідэнцкіх выбараў і патрабуюць пакараць вінаватых у фальсіфікацыя і гвалце. Як прайшоў гэты дзень – у аглядзе «Белсату».
У ААН адказалі на абвінавачванні беларускіх уладаў
Афіцыйны Менск абвінаваціў ААН у фінансаванні адвакатаў «радыкалам» з грошай, вылучаных на людзей з інваліднасцю. З галоўнага офісу ААН больш разгорнуты каментар даў афіцыйны прадстаўнік Упраўлення Вярхоўнага камісара ААН у правах чалавека Рупэрт Колвіл.
«Мы не прымаем характарыстыку дадзенай сітуацыі, асабліва версію падзеяў, якую адлюстроўваюць СМІ, падкантрольныя дзяржаве», – адказаў Колвіл «Белсату».
Санкцыі Еўразвязу могуць быць гатовыя ў лістападзе
Карэспандэнт радыё «Свабода» ў Бруселі Рыкард Юзвяк раней перадаваў, што пяты пакет санкцыяў Еўразвязу супраць беларускага рэжыму мае быць гатовы да канца кастрычніка. Цяпер піша, што пакет можа быць гатовы ў лістападзе.
Улады не пабачылі парушэнняў у карыкатуры са свастыкай у «Мінскай праўдзе»
Першы намеснік начальніка УУС Менаблвыканкаму Віталь Казлоў адказаў на зварот грамадзянаў, што «падчас правярання парушэнняў дзейнага заканадаўства з боку УП ІА «Мінская праўда» не выяўлена» і прапанаваў пры нязгодзе абскардзіць адказ. Тэкст адказу апублікавалі на сайце Petitions.by.
У Беларусі 812 палітвязняў
Праваабаронцы прызналі палітвязнямі Міхаіла Чамураку, Уладзіміра Сушко, Аляксандра Літвішчанку, Аляксандра Жыхарэвіча, Аляксандра Курганскага, Аксану Каспяровіч, Артура Жвірыдоўскага, Ігара Бузука.
Цяпер у нашай краіне 812 палітычных зняволеных.
У Варшаве з’явілася развязка Вольнай Беларусі
На скрыжаванні вуліцы Пулаўскай (Puławska) і алеі Легіёнаў Пілсудскага (Legionów Piłsudskiego) на Паўднёвай кальцавой Варшавы (Południowa Obwodnica Warszawy) афіцыйна з’явілася кругавая развязка Вольнай Беларусі (Rondo Wolnej Białorusi).
Беларускія вайскоўцы на мяжы Таджыкістану і Афганістану
Міністэрства абароны паведаміла аб выпраўленні беларускага кантынгенту на вучэнні Арганізацыі дамовы аб калектыўнай бяспецы, якія пройдуць 18-23 кастрычніка ў Таджыкістане, блізу афганскай мяжы.
Як піша міністэрства, на вучэнні выправіліся не толькі вайскоўцы ўзброеных сілаў, але і байцы спецназу ўнутраных войскаў, і супрацоўнікі Міністэрства надзвычайных сітуацыяў.
Міграцыйны крызіс
Спецслужбы Літвы паведамляюць, што больш за 10 асобаў, якія нелегальна патрапілі ў Літву, звязаны з той ці іншай тэрарыстычнай арганізацыяй або групоўкай. Некалькі асобаў ужо дэпартавалі з краіны, піша «Delfi».
Прадстаўнікі Службы памежнай аховы Польшчы 15 кастрычніка распавялі, што кожны мігрант плаціць рэжыму Лукашэнкі $ 2000–14 000 за спробу нелегальна трапіць у Еўропу. Ад пачатку года спробаў нелегальнага перакрочвання мяжы было ўжо 19 500 (і гэта толькі на беларуска-польскай мяжы, а мігранты таксама ідуць у Літву і Латвію).
Хваля каронавіруса накрывае Беларусь
Статыстыка ўсяго з пяці буйных медычных установаў Віцебскай вобласці паказала: за дзень выяўлялі да 1519 выпадкаў COVID-19, а гэта 81 % ад таго, што за той дзень Міністэрства аховы здароўя рапартавала пра ўсю краіну.
СК belsat.eu
