Беларусы звярталіся ў Міністэрства інфармацыі і Міністэрства ўнутраных справаў наконт карыкатуры, дзе крыж на каталіцкіх святарах ператвараецца ў свастыку. Мінінфарм назваў карыкатуру недапушчальнай, а МУС – цалкам законнай.
Ніякіх тлумачэнняў адносна карыкатуры МУС не дае. Першы намеснік начальніка УУС Менаблвыканкаму Віталь Казлоў напісаў толькі, што «ў ходзе правядзення праверкі парушэнняў дзейнага заканадаўства з боку УП ІА «Мінская праўда» не выяўлена» і прапанаваў пры нязгодзе абскардзіць адказ. Тэкст адказу апублікавалі на сайце Petitions.by.
Мінінфарм раней даў разгорнуты адказ, у якім заявіў, што публікацыя «можа нанесці шкоду міжканфесійным адносінам», і паведаміў, што патрабаваў ад дзяржаўнага выдання «прыняць захады ў недапушчэнні такіх публікацыяў у далейшым».
Пры тым за публікацыю свастыкі ў Беларусі могуць пасадзіць пад арышт. Напрыклад, у жніўні краязнаўцу прысудзілі 7 содняў арышту за публікацыю фота, на якім савецкія жаўнеры ў вызваленым ад нямецкіх нацыстаў Віцебску трымаюць трафейны сцяг са свастыкай.
7 верасня беларускі інтэрнэт выбухнуў навіною пра тое, што дзяржаўная газета «Мінская праўда» назвала каталіцкіх святароў, якія выступаюць супраць гвалту і за нацыянальныя сімвалы, нацыстамі.
З заявай выступілі каталіцкія біскупы Беларусі, назваўшы карыкатуру і артыкул «Мінскай праўды» «свядомым і зламысным скажэннем праўды, паклёпам і абразай». Працоўная група Каардынацыйнай рады «Хрысціянская візія» заявіла, што «карыкатурны малюнак каталіцкіх святароў з крыжамі ў выглядзе свастыкі мае прыкметы наўмысных дзеянняў, накіраваных на дыфамацыю Рымска-каталіцкага касцёлу ў Беларусі, на фармаванне негатыўнага вобразу каталіцкіх святароў як «нацыстаў», на распальванне рэлігійнай варожасці або непрыхільнасці да рыма-каталіцкіх святароў». Абурыліся не толькі каталікі, і шмат хто пабачыў тут праявы крымінальнага злачынства – распальвання варожасці.
АА belsat.eu