«Ніколі не казаў, што я белы і пухнаты». Валер Сахашчык адмаўляецца ад расейскага грамадзянства

Чалец Аб’яднанага пераходнага кабінету Беларусі Валер Сахашчык пацвердзіў у інтэрвʼю «Белсату» свой намер адмовіцца афіцыйна ад расейскага грамадзянства. Ён заявіў, што зробіць гэта сёння, 15 верасня.

Валер Сахашчык, былы камандзір Берасцейскай дэсантна-штурмавой групы, на канферэнцыі дэмакратычных сілаў «Новая Беларусь» у Вільні, Літва. 8 жніўня 2022 года. Фота: Белсат

Пра тое, што Валер Сахашчык мае намер адмовіцца ад расейскага пашпарту, заявіла 14 верасня кіраўніца Пераходнага кабінету Святлана Ціханоўская. Гэта пацвердзіў у інтэрвʼю і сам Сахашчык.

«Размова ўчора адбылася такая, што я мушу афіцыяльна аформіць адмову ад гэтага грамадзянства. І, як я разумею, сёння гэта зраблю. Звярнуся па дапамогу да людзей, якія ведаюць, як гэта робіцца», – сказаў Валер Сахашчык.

Ён яшчэ раз сцвердзіў, што даўно не карыстаецца расейскім пашпартам і не планаваў ім карыстацца.

«Я яго даўно не выкарыстоўваў, ён застаўся ў Беларусі, я жыву ўжо сёмы год у Польшчы. І я наагул не лічыў, што гэта ёсць праблемаю», – зазначыў суразмоўца «Белсату».

«Як адбылося, так і адбылося»

Паводле Валера Сахашчыка, Святлане Ціханоўскай пра сваё расейскае грамадзянства на канферэнцыі ў Вільні ён проста не паспеў сказаць.

«Я ўжо папрасіў, каб склалі нейкую анкету, дэкларацыю, каб я адказаў на ўсе пытанні. Мне ў маім жыцці хаваць абсалютна няма чаго. Пачнем з таго, што я ніколі не казаў, што я ідэальны, белы і пухнаты, што ў мяне няма ніякіх касякоў і шкілетаў у шафе.

Я ніколі не планаваў рабіць карʼеру палітыка і не рыхтаваўся да яе. Усё атрымалася экспромтам. Таму як адбылося, так і адбылося. Я нікога ніколі не падманваў. У мяне ёсць вялікая праблема ў жыцці – я не ўмею падманваць», – кажа Валер Сахашчык.

«Я маю права на асабістае стаўленне?»

Што да фотаздымкаў з Крамля і Краснай плошчы, якія карыстальнікі знайшлі ў сацсетках, Сахашчык патлумачыў, што гэта фота са святкавання 100-годдзя Крамлёўскай вучэльні, якую ён скончыў («Гэта старонкі маёй біяграфіі, ад якіх не збіраюся адмаўляцца»). А што да выказвання пра «сталіцу геяў», зазначыў, што гэтай фразай проста выказаў сваё асабістае стаўленне.

«Я маю права на асабістае стаўленне? Тым больш, што дакладна тады я не быў ніякім палітыкам… Мне здаецца, я нікога там не пакрыўдзіў», – заявіў Валер Сахашчык.

На погляд Сахашчыка, у Беларусі цяпер шмат афіцэраў, якія, як і ён, служылі ў Савецкай арміі і аўтаматычна атрымалі расейскае грамадзянства. Але ён упэўнены, што большасць з іх – «патрыёты сваёй Радзімы».

Валер Сахашчык стаў першым вайсковым міністрам у пераходным кабінеце, пра які 9 жніўня абвесціла Святлана Ціханоўская. Ягоная афіцыйная пасада называецца «прадстаўнік кабінету ў справе абароны і нацыянальнай бяспекі».

Адкуль у Сахашчыка расейскі пашпарт? Вечаровы эфір за 13 верасня

Зміцер Міраш belsat.eu

Падпісвайся на telegram Белсату

Hавiны