З пачатку жніўня ў Менску запрацавалі 27 дадатковых пунктаў вакцынацыі супраць каронавіруснай інфекцыі. Яны месцяцца па-за ўстановамі аховы здароўя. Пра гэта паведаміла галоўная адмыслоўца аддзелу першаснай медычнай дапамогі камітэту аховы здароўя Менгарвыканкаму Ірына Талкачова.
Пункты вакцынацыі можна знайсці ў наступных месцах: ГЦ «Карона» на вул. Дзянісаўскай (Ленінскі раён), ГЦ «Тытан» (Маскоўскі раён), ГЦ «Максімус» (Фрунзенскі раён), ГЦ «Дана Мол» (Першамайскі раён), ГЦ «Момо» (Заводскі раён), на станцыі метро «Кавальская Слабада».
З вакцынаў у наяўнасці «Спутник V», «Спутник Лайт» і кітайская вакцына «Sinopharm». Прышчапляюць толькі дарослых – ад 18 гадоў. З сабою трэба мець пашпарт.
Няпоўнагадовым прышчэпкі ў Беларусі робяць толькі ва ўстановах аховы здароўя.
Паводле намесніка міністра аховы здароўя Рэспублікі Беларусь Аляксандра Тарасенкі, з верасня чакаецца рост захваральнасці на COVID-19, таму лекары заклікаюць зрабіць прышчэпку ўжо цяпер, а калі прышчапляліся раней, то прайсці бустарную вакцынацыю. Для «бустару» ў Беларусі прапаноўваюць вакцыны «Спутник Лайт» і «Спутник V» (адна доза).
Марыя Міхалевіч belsat.eu