Польскія памежнікі абвінавачваюць беларускі бок у пашкоджанні жалезнай агароджы, узведзенай на польска-беларускай мяжы дзеля абароны ад нелегальнай міграцыі, паведаміла прадстаўніца Памежнай аховы Польшчы Анна Міхальска.
Затрыманыя на польскім баку мігранты распавялі, што супрацоўнікі беларускіх спецслужбаў падводзяць іх да мяжы, а таксама дапамагаюць перайсці праз плот. Пакуль мігранты чакаюць у кустах, памежнікі з дапамогай адмысловых інструментаў – вуглавых шліфмашынаў («балгарак»), спецыялізаваных фрэзаў і прафесійных працоўных пальчатак – робяць у плоце прарэзы. Праз іх потым прапускаюць 2–5 асобаў, а на забалочаных тэрыторыях нават большыя групы.
Тым не менш, паводле Анны Міхальскай, колькасць мігрантаў, якія спрабуюць незаконна перайсці беларуска-польскую мяжу, значна скарацілася ў параўнанні з мінулым годам (з 800 да 80 за содні), што гаворыць пра тое, што пабудова плоту акупляецца.
З пачатку 2022 года польскія памежнікі зарэгістравалі 7401 спробу незаконнага пераходу беларуска-польскай мяжы.
30 чэрвеня Польшча паведаміла, што скончыла на мяжы з Беларуссю будаўніцтва сталёвай агароджы даўжынёй 186,25 км. Кошт праекту ацэньваецца на 353 млн еўраў.
Цяпер на польска-беларускай мяжы ўзводзяць электронны бар’ер даўжынёй 202 км. Ён будзе абсталяваны камерамі, сэнсарамі руху, інфрачырвонымі цеплавізарамі і сістэмай выяўлення вібрацыяў. Новая агароджа мусіць быць гатовая ў сярэдзіне верасня.
Агульны кошт металічнага і электроннага плоту – 1,6 млрд злотых.
Марыя Міхалевіч belsat.eu