Падштам BA.5 распаўсюджваецца хутчэй за ранейшыя «версіі» віруса і можа абысці некаторыя імунныя рэакцыі.
Намеснік міністра аховы здароўя Беларусі, галоўны санітарны доктар Аляксандр Тарасенка расказаў, што ў Беларусі зарэгістравалі новы варыянт каронавіруса: падштам BA.5 штаму о-мікрон віруса SARS-CoV-2, які выклікае хваробу COVID-19.
Тарасенка адзначыў: о-мікрон мутуе, і ў Заходняй Еўропе і Амерыцы назіраецца рост захворванняў, нягледзячы на дастатковую колькасць вакцынаваных. Гэта сапраўды так: за апошні тыдзень у Злучаных Штатах і Францыі выявілі больш як 800 тысяч новых выпадкаў у кожнай краіне, у Італіі і Нямеччыне – больш як 600 тысяч, а ўсе гэтыя краіны вакцынавалі больш за тры чвэрці насельніцтва.
Гэта ўсё той жа ковід, але вірус стаў больш заразлівы. Добрая навіна ў тым, што новы падштам выклікае менш шпіталізацыяў і смерцяў, кепская – што ён, падобна, можа заражаць тых, хто меў імунітэт ад ранейшых формаў о-мікрону нават у камбінацыі «вакцына + перанесеная хвароба». Вакцынацыя ўсё яшчэ лепшая за адсутнасць вакцынацыі, але прышчэпка бароніць ужо не настолькі надзейна.
І нават пасля лёгкай формы каронавіруса можа здарыцца так званы пасляковідны сіндром: самыя розныя наступствы хваробы не знікаюць нават тады, калі вірус сыходзіць з арганізма.
Што ў Беларусі са статыстыкай захворванняў, невядома: Міністэрства аховы здароўя адмовілася ад рэгулярных публікацыяў статыстыкі: апошняя публікацыя была 5 ліпеня, перадапошняя – 10 траўня. Але афіцыйная статыстыка не выклікае даверу: напрыклад, статыстыка смяротнасці ад ковіду заніжаная прыблізна ў 14 разоў.
Але Тарасенка заспакойвае: Беларусь наблізілася да 70 % вакцынаваных ва ўзросце ад 12 гадоў, уздыму захворвальнасці няма, а рост захворвальнасці чакаецца ў пачатку верасня.
Алесь Наваборскі belsat.eu