Расейскі віцэ-прэмʼер Марат Хуснуллін распавёў у інтэрвʼю каналу «Россия 24», што Масква плануе актыўна прыцягваць на будаўнічыя працы беларускіх грамадзян і расейскіх вязняў.
Паводле віцэ-прэм’ера, «было б нядрэнна» прыцягнуць на працы ў Расею 20-30 тысяч беларускіх будаўнікоў.
«Нас задавальняюць беларускія рабочыя і па якасці працы, і па яе кошту. Да таго ж у нас вельмі падобнае працоўнае заканадаўства, якое фармавалася яшчэ ў савецкі перыяд. Калі дамовімся па ўмовах, то, вядома, будзем запрашаць нашых суседзяў», – сказаў ён.
Хуснуллін канстатаваў, што сёння ў Расеі на будоўлях не хапае працоўнай сілы. Беларускіх рабочых магчыма будуць выкарыстоўваць на будаўніцтве касмадрому «Усходні», Усходняга палігону, культурнага цэнтру ў Калінінградзе.
Акрамя беларусаў расейскі ўрад плануе актыўна выкарыстоўваць працу зняволеных. Па словах Хуснулліна, у расейскіх турмах знаходзяцца амаль 180 тысяч зняволеных.
«Гэта даволі шмат. Нават калі 20-30% з іх мабілізуем, то гэта ўжо нядрэнна», – заявіў віцэ-прэмʼер.
ІІ belsat.eu
