Феміністка, нізавая актывістка Наста Базар дапамагае пацярпелым ад сексуальнага гвалту падчас вайны ва Украіне. Яна распавяла «Белсату», з якімі праблемамі найчасцей сутыкаецца ў сваёй дзейнасці.
«Тэма сексуальнага гвалту вельмі трыгерная. Вялікая колькасць людзей адгукаецца. Мне прыходзяць запыты на канкрэтную дапамогу, людзі хочуць перавесці грошы канкрэтным жанчынам, якія пацярпелі ад сексуальнага гвалту. А ў мяне няма гэтых кантактаў, магу толькі накіроўваць у арганізацыі, якія гэтым займаюцца. Шмат людзей вакол хочуць быць карыснымі», – распавядае Наста.
Паводле актывісткі, дапамагаюць згвалтаваным ва Украіне адразу некалькі супольнасцяў: каляжанкі з «BySol», «MedSol», «GirlPowerBelarus» і проста феміністкі паасобку. На старонцы «BySol» фінансава падтрымалі збор ужо нават больш, чымся было запланавана:
«Мне вельмі прыемна, што ўдалося сабраць столькі сродкаў, але мне вельмі шкада, што праз бюракратычныя розныя рэчы дасюль гэта ўсё ў працэсе. Каляжанкі зрабілі вялізарную працу, каб знайсці і наборы «rape kit», і лекі, але праз бюракратыю ўсё вельмі зацягваецца. Каб перавезці гэта праз мяжу і перадаць тым, каму мы давяраем, усё патрабуе часу. Адзінае, на што я маю надзею, – што будзе наладжаная такая дарога, каб каляжанкі змаглі працягваць дапамагаць далей».
На гэты момант ужо знойдзеныя 500 «rape kit»: гэтыя наборы прадметаў для збору і захоўвання рэчавых доказаў сексуальнага гвалту дапамогуць зафіксаваць злачынства.
«Я ўпэўненая, што з гэтага збору і набораў вырасце нешта большае ды будзе сістэматычная падтрымка пацярпелых. Каляжанкі хочуць рабіць нешта на перспектыву», – адзначыла Наста Базар.
Наста трымае кантакт і з украінскімі жаночымі арганізацыямі, якія займаюцца не толькі праблемаю сексуальнага гвалту, але і больш шырокім падтрыманнем: ежай, медыкаментамі ды іншым:
«Марш жанчын» надае, напэўна, самую вялікую дапамогу жанчынам. У іх вельмі шмат запытаў, яны не спраўляюцца, у іх няма доступу да гуманітарнай дапамогі, якая едзе ва Украіну. Яны самастойна шукаюць дапамогу ў розных краінах. Калі ў каго ёсць жаданне дапамагчы жанчынам ва Украіне, я даю кантакты менавіта гэтай супольнасці. Ёсць шмат невялікіх праектаў. Напрыклад, у Польшчы ёсць «Мартынка», куды жанчыны могуць напісаць і атрымаць розную дапамогу. Ёсць польскія арганізацыі, якія дапамагаюць людзям з досведам уцякацтва. Гэта ўсё перакрыжаванае, і сетка расце».
Актывістка падкрэсліла, што асабіста не кантактавала з пацярпелымі ад сексуальнага гвалту і не шукае гэтых кантактаў: «Калі да мяне звернецца жанчына, я ёй дапамагу. Але на гэты момант такога няма. Хаця быў пазітыўны вынік пасля інтэрв’ю на «Белсаце»: мне напісала жанчына з невялічкай вёскі ва Украіне з просьбаю дапамагчы выехаць. Бо яна проста не ўяўляла, як ёй ехаць на мяжу, як праходзіць, як не сесці ў чужую машыну ды іншае. Я ёй дапамагла, пасля гэтага напісалі ейныя сяброўкі і сяброўка сябровак. Карацей, чатыры жанчыны з дзецьмі выехалі, яны ў бяспецы, і я вельмі радая, што яны не трапяць у дрэнныя гісторыі. Гэта маленькая перамога».
Наста падкрэслівае, што ў гэтай тэме працаваць вельмі складана, бо трэба змагацца з наступствамі:
«І прычына – не вайна. Прычына – адсутнасць гендарнай роўнасці, аб’ектывацыя жанчын, і з гэтым вельмі цяжка працаваць, бо пра гэта не хочуць чуць, пра гэта не хочуць казаць. Мала таго, у мяне такое адчуванне, што тэму сексуальнага гвалту ва Украіне вельмі прыкрываюць».
Вялікі ўзровень хатняга гвалту – і ў Расеі, і ў Беларусі, і ва Украіне – таксама грае на карысць узроўню гвалту на вайне.
«Пра што мы казалі яшчэ з 2020 года, яшчэ падчас нашай рэвалюцыі: немагчымы такі гвалт дзяржаўнага ўзроўню, калі б у нас не было такога ўзроўню хатняга гвалту. Але, на жаль, пакуль гэта праблема людзей, якія не каля ўлады, праблема не большасці, пра гэта не гавораць. Але гэты гвалт быў: у дачыненні жанчын, у дачыненні ЛГБТК-супольнасці. І калі кажуць, маўляў, чакайце, чакайце, мы вось зараз рэвалюцыю скончым, вайну, а тады разбяромся, – вось гэта вялікая праблема. Бо гэтым варта было займацца пазаўчора, дзясяткі гадоў таму», – звяртае ўвагу актывістка.
Гвалт за зачыненымі дзвярыма, пра які не хацелі гаварыць і якога не хацелі бачыць, у пэўны час выходзіць вонкі.
«Цяпер ужо большая колькасць людзей, пацярпелых ад гвалту, кажуць: ой, а як гэта так? А вось так: гвалт заўжды быў, толькі пра яго не казалі. Што рабіць, каб не гвалтавалі на вайне? Адказ адзін: каб не было вайны. Пакуль мужчыны абараняюць жанчын ад іншых мужчынаў, мы нічога не зробім. Вайна – гэта не чалавецкасць, гэта не нармальна. Не можа быць так, што мы забіваем, але не гвалтуем. Такога не бывае», – тлумачыць Наста.
З пачатку ваеннага ўварвання Расеі ва Украіну больш за 400 жанчын паведамілі пра сексуалізаваны гвалт з боку расейскіх вайскоўцаў, распавяла ўпаўнаважаная ў пытанні правоў чалавека краіны Людміла Дэнісава. Яна таксама накіравала зварот у UNICEF з просьбаю накіраваць у краіну больш псіхолагаў для дапамогі жанчынам. Але гэта, хутчэй, выключэнне, калі інфармацыя пра гвалт была распаўсюджана, мяркуе Наста:
«Я ведаю пра гэтую заяву, але ведаю і пра выпадкі, калі была патрэбная дапамога вялікай колькасці жанчын, але пра гэта нідзе не пісалі і не гаварылі. Я думаю, што гэта праз табуяванасць тэмы.
Бо ў патрыярхальным свеце гэта сорамна.
Але пры гэтым кожны раз, калі я размаўляю з украінцамі і ўкраінкамі, яны кажуць, што па ўсіх чатах ходзіць інфармацыя і ўсе пра гэта ведаюць. Але чаму няма гэтай інфармацыі на каналах, не агучваецца ніводным кіраўніком? У Бучы была вялікая колькасць жанчын, якіх згвалтавалі і павесілі. Пра гэта кажуць шмат асобаў з Украіны ў простых размовах, але пра гэта маўчаць на дзяржаўным узроўні?..»
Актывістка адзначае, што цяперашняя праца вельмі знясільвае людзей, бо трэба гасіць пажары і рабіць тое, што мусіла быць зроблена яшчэ ў пачатку сакавіка:
«Мы будзем намагацца працаваць на апераджэнне. Бо, пакуль вайна не скончыцца, будуць жанчыны, якім спатрэбіцца дапамога. Будуць новыя дэакупаваныя тэрыторыі і новыя пацярпелыя. Але пры гэтым я разумею, што трэба яшчэ больш працы, каб давесці да людзей: пакуль у нас будзе патрыярхат, пакуль будзе аб’ектывацыя – будзе гвалт. Пры гэтым, калі мне кажуць, што вайна дае магчымасць гвалту: безумоўна, гэта ў першую чаргу пра ўладу, але калі гвалт становіцца магчымым, калі няма сведкаў, няма пакарання і пры наяўнасці фізічнай сілы ці зброі. І я б не рабіла акцэнту толькі на расейскіх салдатах. Праблема гвалту нашмат шырэйшая. Гэта можа быць сусед, які разумее, што жанчына нікуды не пойдзе і не давядзе. Я разумею гэты гераізм, усе супраць расейскіх салдатаў. Яны сябе максімальна дыскрэдытавалі.
Я хачу казаць пра гвалт не для таго, каб паказаць іхную бесчалавечнасць. А каб звярнуць увагу, што гвалт – прадукт таго, як мы раней жылі».
У мірны час па дапамогу пасля гвалту звяртаюцца толькі 15 % пацярпелых, а ў ваенны час лічба значна ніжэйшая. Наста Базар адзначае, што праз замоўчванне амаль немагчыма зразумець маштаб праблемы. Таму яна працягвае заклікаць жанчын не маўчаць, звяртацца ў ініцыятывы падтрымання пацярпелых, дзе без лішніх пытанняў дапамогуць псіхалагічна, медычна, юрыдычна і як толькі будзе трэба.
МГМ belsat.eu