Непаўнагадовага палітвязня Мікіту Залатарова «пераарыштавалі» па новай крымінальнай справе
Палітвязня Мікіту Залатарова, якому толькі 12 траўня споўнілася 17 гадоў, вінавацяць у новай крымінальнай справе – нібы за напад на працаўніка СІЗА.
Падлетак быў «пераарыштаваны» для правядзення следчых дзеянняў у рамках узбуджанай справы, паведамляе выданне «Сильные новости».
Бацькі Мікіты паведамляюць, што ў чаканні афармлення працэдуры новага арышту іх сына на працягу доўгага часу пратрымалі ў аўтазаку, дзе яго, хлопца вагой 50 кілаграмаў, ахоўвала чацвёра велізарных сілавікоў.
Пагаварыць з сынам, а таксама перадаць яму ежу і ваду, бацькам не дазволілі. Мікіта паспеў толькі сказаць ім, што больш не можа цярпець: калі застанецца адзін у камеры – ён не вытрымае.
Адвакат Мікіты параіў бацькам напісаць заяву ў пракуратуру з нагоды ўтрымання іх сына ў «адзіночцы», спаслаўшыся на тое, што, верагодна, пракуратуры не вядома пра гэты факт.
«Ці ведаюць жонкі, дзеці, маці тых, хто зараз нясе адказнасць за майго сына, што яны забіваюць дзіця?» – пытаецца бацька Мікіты Міхаіл.
Бацькі адзначаюць, што Мікіта выглядае вельмі бледным і схуднелым, а яго самаадчуванне з часу апошняга спаткання відавочна пагоршылася.
Хлопца затрымалі 11 жніўня 2020 года і асудзілі на 5 гадоў калоніі за «гвалт у дачыненні працаўніка ўнутраных органаў», «незаконныя дзеянні з палкімі рэчывамі» і «арганізацыю масавых беспарадкаў». Паводле следства, ён нібыта быў сярод тых, хто кідаў «кактэйлі Молатава» у вайскоўцаў. Сваёй віны Мікіта не прызнае.
Міжнародная праваабарончая арганізацыя «Amnesty International» заклікала ўлады Беларусі вызваліць Мікіту Залатарова.
АД, belsat.eu
