Марыупальскі гарадскі савет паведамляе, што з гораду на 14:00 15 сакавіка выехала ўжо 2 тысячы легкавых машынаў.
Яшчэ 2 тысячы аўтаў стаяць на выездзе з гораду.
Людзі рухаюцца маршрутам Марыупаль – Мангуш – Бярдзянск – Такмак – Васілеўка – Запарожжа, каб атрымаць у выніку неабходную дапамогу.
Гуманітарны калідор з Марыупалю, што патрапіў пад абстрэл расейскіх вайскоўцаў (у тым ліку снарад трапіў у гарадскую радзільню), адкрыўся днём 14 сакавіка. Горад быў у аблозе два тыдні: туды не маглі даставіць неабходных медыкаментаў, харчоў і вады. Украінскія ўлады казалі, што Марыупаль на мяжы гуманітарнай катастрофы.
Тыя, хто ўжо змог выехаць, атрымалі неабходную дапамогу: харчы, медыкаменты і прадметы першай неабходнасці. Частка людзей застаецца ў Запарожжы, іншыя пастанавілі паехаць далей прыватным маршрутам, паведамляюць мясцовыя ўлады.
Але дагэтуль канвой з гуманітарнай дапамогай не можа трапіць у сам Марыупаль, дзе застаюцца дзясяткі тысяч чалавек.
АД belsat.eu
