Міністэрства па надзвычайных сітуацыях падвяло папярэднія вынікі моцнага ветру, які пракаціўся па Беларусі 14 студзеня. Месцамі фіксаваліся парывы да 32 м/с.
У 58 раёнах краіны пацярпелі 458 населеных пунктаў: у Берасцейскай вобласці – 27, у Віцебскай – 39, Гомельскай – 20, Гарадзенскай – 74, Менскай – 178, Магілёўскай – 120.
Былі пашкоджаныя дахі 427 жылых дамоў, 66 сацыяльных і культурных аб’ектаў, 20 – вытворчых, 602 сельскагаспадарчых будынкаў.
Зафіксаваныя 170 выпадкаў падзення дрэваў, найбольш – у Менскай вобласці (78).
Элементамі дахаў і дрэвамі пашкоджаныя 32 аўтамабілі. Дрэвы падалі таксама на чыгуначныя шляхі і лініі электраперадач. У выніку затрымка руху 18 пасажырскіх і 24 грузавых цягнікоў склала ад 11 хвілінаў да 3 гадзінаў 22 хвілінаў.
З 16.45 да 21.00 14 студзеня без электрычнасці заставаліся г.Быхаў і населеныя пункты Быхаўскага раёну Магілёўскай вобласці. Перыядычна парушалася электразабеспячэнне 3114 населеных пунктаў па ўсёй краіне, найбольш – у Віцебскай вобласці – 915 населеных пунктаў.
Паводле дадзеных на раніцу 15 студзеня без электрычнасці заставаліся 366 населеных пунктаў па ўсёй Беларусі, найбольш у Магілёўскай вобласці – 156.
У Воршы без ацяплення засталіся інтэрнат, прыватны дом і 2 адміністратыўных будынка, бо праз падзенне апораў эстакады на станцыі Ворша-Цэнтральная была пашкоджаная цеплатраса. Абяцаюць усё выправіць 15 студзеня.
У Менску на праспекце Ракасоўскага пластыкавым пакрыццём, сарваным з прыпынку, была траўмаваная жанчына 1955 г.н. Пасля аказання медыцынскай дапамогі яе адпусцілі дамоў.
У Магілёве рэкламнымі шчытамі былі траўмаваныя мужчына 1973 г.н. і жанчына 1990 г.н. Абодва шпіталізаваныя.
У Менску з вадасховішча Дразды працаўнікі АСВОД даставілі з лёду на бераг 15 рыбакоў, якія не змаглі самастойна дабрацца з-за моцных парываў ветру. Рыбакі не пацярпелі.
ГГ, belsat.eu