Жанчына цягам цэлага года пераследавала жыхарку польскай сталіцы. Дасылала абразлівыя смс, прыходзіла з пагрозамі на працу і бесперастанна сачыла за ёю. Прычына – у рэўнасці.
Як аказалася, мужчына, які калісьці быў вельмі блізкі беларусцы, рэгулярна наведваў касметычны салон, уладальніцаю якога была пакрыўджаная полька. Беларуска прыйшла да высновы, што той пакінуў яе дзеля варшавянкі.
Полька ўрэшце не вытрымала і падчас чарговага візіту беларускі вызвала паліцыю. Калі праваахоўнікі прыехалі на месца, жанчына накінулася на іх, драпала пазногцямі, цягнула за мундзіры і ўрэшце ўкусіла паліцэйскага, які не вельмі ўсведамляў, як мае сябе паводзіць з такою агрэсіўнаю пажылою асобаю.
Беларуску прэвентыўна арыштавалі на тры месяцы, яе чакае суд паводле абвінавачання ў «сталкінгу» – навязлівым пераследзе асобы. Ёй пагражае нават два гады турмы.
У.Ш., belsat.eu
