94 гады турмы ў «справе Ціханоўскага», крымінал у закліках да санкцыяў. Галоўнае за 14 снежня
Палітычны крызіс пасля прэзідэнцкіх выбараў у Беларусі трывае 491 дзень. Улады не паказваюць прыкметаў замірэння. «Белсат» пераказвае галоўныя падзеі 14 снежня.
Галоўнай навіной дня сталі жорсткія выракі фігурантам «справы Ціханоўскага». Сяргея Ціханоўскага пасадзілі на 18 гадоў, адбываць пакаранне ён будзе ў калоніі ўзмоцненага рэжыму. Арцёму Сакаву і Дзмітрыю Папову прысудзілі 16 гадоў калоніі ўзмоцненага рэжыму кожнаму. Уладзімір Цыгановіч і Ігар Лосік асуджаныя на 15 гадоў калоніі ўзмоцненага рэжыму. Мікола Статкевіч – да 14 гадоў пазбаўлення волі ў калоніі асобага рэжыму.
І гэта далёка не адзіны эпізод палітычных рэпрэсіяў за дзень. Перад прысудам у «справе Ціханоўскага» затрымалі журналіста Анатоля Гатоўчыца, аштрафавалі на Br 580. Выкладчыцу БДУ затрымалі проста на занятках за фота з пратэстаў. За відэа з пратэстаў і рэпосты «экстрэмісцкіх» каналаў затрымалі дырэктара кампаніі «Aivitam» Дзмітрыя Досава. А Паліну Шарэнду-Панасюк у калоніі пазбавілі цёплых рэчаў і харчовых пасылак.
Музыкаў «Irdorath» Надзею і Уладзіміра Калачоў асудзілі на 2 гады калоніі за гранне музыкі на маршах пратэсту. Гарадзенца Дзяніса Зубрыцкага асудзілі за ўдзел у Маршы адзінства на 2 гады «хіміі». Анатоля Шалковіча, які стварыў мэм пра любоў да памідораў, трэці раз асудзілі на 15 дзён арышту.
«Экстрэмісцкімі фармаваннямі» назвалі ініцыятывы «BY_help», «Беларуcам.рl» і «Media Solidarity Belarus». Фонд «BYSOL» назвалі «экстрэмісцкім фармаваннем» яшчэ 3 снежня.
Аляксандр Лукашэнка падпісаў закон (які сам і даручыў вынесці на разгляд), які ўводзіць крымінальную адказнасць за заклікі да санкцыяў, пакаранне – да 12 гадоў пазбаўлення волі.
У той жа дзень прэм’ер Польшчы Матэўш Маравецкі прыгразіў Менску новымі санкцыямі ў выпадку эскалацыі на мяжы, а польскія сілавікі апазналі беларускага сілавіка, які кіраваў нападам мігрантаў: пішуць, гэта быў намеснік старшыні Дзяржаўнага памежнага камітэту Беларусі, генерал-маёр Раман Подлінеў.
А ў Літве не спыняецца скандал праз транзіт угнаенняў «Беларуськалію», які працягваецца, нягледзячы на ўведзеныя санкцыі. Увесь урад Літвы можа сысці ў адстаўку.
Сталі вядомыя планы на рэспубліканскі бюджэт 2022 года. Галоўнае – набраць новых крэдытаў. Пакуль жа ў Беларусі рэкордна вырасла грашовая маса.
«Чысткі» на дзяржаўных прадпрыемстваў працягваюцца. Паводле «ByPol», масавыя звальненні дабраліся і да МУС. Звольніць могуць нават міністра Івана Кубракова. На «Белтэлекаме» ўвялі адмысловую пасаду для палкоўніка КДБ, які будзе займацца «чысткамі». Камандзіра байцоў «Алмазу» раптоўна прызначылі намеснікам дырэктара спарткомплексу «Стайкі» – «Трыбуна» піша, ён таксама будзе займацца «чысткамі». У менскіх ліцэях № 1 і № 2 не проста «чысткі» – самі ліцэі збіраюцца закрыць.
Былі 14 снежня і добрыя навіны – праўда, не з Беларусі, а з Паўднёвай Афрыкі. Там правялі першае маштабнае даследаванне штаму о-мікрон віруса SARS-CoV-2. Хай гэты штам і выклікае больш паўторных заражэнняў, але пры ім менш шпіталізацыяў, а вакцыны супраць яго засталіся эфектыўнымі: хоць ужо слабей бароняць ад заражэння, затое даволі добра бароняць ад шпіталізацыі.
АА belsat.eu
