Святлана Ціханоўская лічыць, што тэлефонныя перамовы Уладзіміра Макея і Жузэпа Бурэля не азначаюць, што Еўразвяз гатовы сесці за стол перамоваў з рэжымам Лукашэнкі.
«Мы ведаем, пра што было тэлефанаванне Бурэля і Макея. Рэжым страціў кантроль над сітуацыяй з міграцыйным крызісам настолькі, што ЕЗ бярэ дапамогу мігрантам на мяжы ў свае рукі. Я заклікала ААН і міжнародныя гуманітарныя арганізацыі ўмяшацца і дапамагчы развязаць гэты крызіс, таму, вядома, гэта добрая навіна, што людзям акажуць дапамогу.
Няма ніякіх сумневаў, што мэта гэтага званка Бурэля – папярэджанне, а не старт дыялогу. ЕЗ неўзабаве абвесціць пяты пакет санкцый супраць рэжыму. Патрабаванні ЕЗ для спынення ціску не мяняліся: вызваліць усіх зняволеных па палітычных матывах і распачаць дыялог з народам аб новых выбарах», – адзначаецца ў заяве, апублікаванай у Telegram-канале Святланы Ціханоўскай.
Яна падкрэсліла, што будзе працягваць адстойваць патрабаванні беларускага грамадства, «і ніякі дыялог не будзе распачаты за спінамі беларусаў».
Нагадаем, сёння кіраўнік МЗС Беларусі Уладзімір Макей і вярхоўны прадстаўнік ЕЗ у замежных справах і палітыцы бяспекі Жузэп Бурэль падчас тэлефонных перамоваў абмеркавалі міграцыйны крызіс.
РР belsat.eu
