Вынікі пошуку для:

Латушка: Адказваць у крымінальных справах будуць тыя, хто іх распачынае

Супраць Святланы Ціханоўскай і Паўла Латушкі ў Беларусі распачалі яшчэ адну крымінальную справу: за самавольнае прысваенне звання ці ўлады службовай асобы. У «калекцыі» Латушкі гэта ўжо пяты крымінальны артыкул.

Павел Латушка, архіўнае фота. Акцыя ў Варшаве ў межах Глабальнага пікету салідарнасці, абвешчанага Святланаю Ціханоўскай. Варшава, Польшча. 29 траўня 2021 года. Фота: АЦ / Белсат

Лідар Наронага антыкрызіснага ўпраўлення Павел Латушка пракаментаваў «Белсату» новае абвінавачанне.

«Як юрыст я разумею, што тут пераблытаны субʼект злачынства – той чалавек, які ажыццяўляе злачынства, – заяўляе Латушка. – Калі паглядзець на 5 крымінальных справаў, распачатых у адносінах да мяне, то вось што атрымліваецца.

Першая справа – факт стварэння экстрэмісцкага фармавання. Якраз такі Аляксандр Лукашэнка гэтым і займаецца. Змова з мэтаю захопу дзяржаўнай улады неканстытуцыйным шляхам – гэта таксама Лукашэнка менавіта такім шляхам утрымлівае ўладу. Наступны пункт – заклік да звяржэння або змены канстытуцыйнага ладу ў Беларусі і злачынства супраць дзяржавы: таксама бачым, што гэта робіць дыктатар і яго хунта. Наступны артыкул – акт тэрарызму. Захоп самалёта, дзеянні, звязаныя з забойствамі і гвалтам над беларусамі, – гэта ўжо адбылося з боку Лукашэнкі.

Апошняе – самавольнае прысваенне звання і ўлады службовай асобы. Ну хто, як не Лукашэнка, самавольна прысвоіў званне і ўладу службовай асобы? Ён лічыць сябе прэзідэнтам краіны, якім ён не зʼяўляецца.

Што за карысць уладам ад новых крымінальных справаў супраць Ціханоўскай і Латушкі?

Усё гэта з юрыдычнага гледзішча фіктыўныя крымінальныя справы. Адказваць у гэтых справах будуць тыя, хто іх распачынае, хто зʼяўляецца галоўным каардынатарам гэтай дзейнасці – дыктатар Аляксандр Лукашэнка. Гэта, з другога боку, палітычнае прызнанне інстытутаў, якія створаныя выбарам людзей. Гэта прызнанне Святланы Ціханоўскай, ейнага Офісу і дзейнасці Народнага антыкрызіснага ўпраўлення.

Пытанне прызнання ці непрызнання вырашае не Следчы камітэт, а беларускія грамадзяне, і яны свой выбар зрабілі.

Думаю, што дастаткова і іншых справаў, каб падаваць адпаведныя ўнёскі ў Інтэрпол, і яны падаваліся, але безвынікова. Зразумела, што краіны, дзе мы знаходзімся, такія рашэнні ніколі не прымуць. Бо гэта ўсё палітычна матываваныя справы.

Як рэжым спрабуе падмануць Інтэрпол

Мы павінны зразумець, што трэба весці дзейнасць, накіраваную на прыняцце ўлады. Казаць адкрыта, шчыра і не баяцца гэтага. Бо калі палітычныя інстытуты не працуюць на тое, каб прыняць уладу, то навошта яны працуюць? Прыняцце ўлады – гэта не мэта для рэалізацыі амбіцыяў асобы Паўла Латушкі, Святланы Ціханоўскай ці іншых. Гэта ўсё дзеля таго, каб змяніць сітуацыю гвалту і тэрору ў Беларусі».

АА belsat.eu

Падпісвайся на telegram Белсату

Hавiны