Літва адмовіла ў прытулку 570 мігрантам, якія нелегальна прыйшлі праз Беларусь

Агулам прашэнняў аб прытулку ад мігрантаў, якія нелегальна перайшлі беларуска-літоўскую мяжу, цяпер 2604, іх разгляд працягваюць.

Агне Білатайце. Фота: Facebook / Agnė Bilotaitė

Міністарка ўнутраных справаў Літвы Агне Білатайце дала справаздачу пра захады, якія Літва прыняла супраць хвалі нелегальнай міграцыі праз беларускую мяжу, якую яна называе гібрыднай атакай з боку Беларусі.

Паводле Білатайце, цяпер сітуацыя на мяжы стабілізавалася, «нягледзячы на высілкі недэмакратычнага рэжыму суседняй краіны ў выкарыстанні нелегальнай міграцыі ў якасці інструменту палітычнага ціску».

Суседзі агароджваюцца ад Беларусі

Міністарка згадала, што ад 2 ліпеня ў Літве абвясцілі надзвычайнае становішча, якое паскорыла працэдуры ў барацьбе з нелегальнай міграцыяй і адкрыла доступ да дзяржаўных рэзервовых фондаў. Ад Еўракамісіі Літва атрымала 37 млн еўра экстранай дапамогі і гуманітарную дапамогу Еўразвязу, але ў верасні збіраецца прасіць дадатковую фінансавую падтрымку, у тым ліку на зімовае жытло для мігрантаў.

Таксама былі ўнесеныя папраўкі ў законы аб прававым становішчы замежнікаў і аб вайсковай службе, быў прыняты адмысловы закон адносна фізічнага бар’еру на мяжы з Беларуссю. Той бар’ер збудавалі на 25 км самых важных участкаў мяжы, плануюць збудаваць звыш 500 км.

Еўрапейскі суд правоў чалавека забараніў Літве выдвараць у Беларусь пяць афганцаў

Са жніўня Літва вырашыла разварочваць у Беларусь мігрантаў, якія спрабуюць трапіць у краіну нелегальна. Не дапусцілі ў Літву каля 2400 чалавек.

На сярэдзіну верасня з тых мігрантаў, якія ўсё ж трапілі ў Літву, 2604 падалі хадайніцтвы аб прытулку. Пакуль разглядзелі 570, усе адхілілі. Ці былі сярод адхіленых хадайніцтвы ад грамадзянаў Беларусі, не паведамляюць, аднак асноўная маса затрыманых мігрантаў называлася грамадзянамі арабскіх і афрыканскіх краінаў.

Яшчэ 130 чалавек добраахвотна вярнуліся з Літвы ў свае краіны (Літва прапануе фінансавую падтрымку тым, хто хоча сам вярнуцца).

АА belsat.eu

Падпісвайся на telegram Белсату

Hавiны