Сайт «еЗдароўе» скіраваны не толькі на дапамогу беларусам з іхнымі хваробамі, але і на падтрымку дактароў, якія страцілі працу праз рэпрэсіі. Цяпер сайт дасяжны толькі праз VPN.
Апоўдні 14 жніўня сайт Okdoc.me платформы «еЗдароўе» стаў недасяжным для карыстальнікаў у Беларусі. Telegram-канал платформы паведаміў, што праект не спыніць дзейнасць:
«У сучасных беларускіх рэаліях такія блакаванні – свайго роду знак якасці, які ніяк не паўплывае на далейшую працу самога сэрвісу. Таму мы нагадваем: прычынаў турбавацца няма – платформа «еЗдоровье» працягне функцыянаваць у звычайным рэжыме».
Праз сайт лекары даюць ананімныя і бясплатныя дыстанцыйныя кансультацыі, на якія можа запісацца любы ахвочы (плаціць просяць добраахвотна – у Фонд медычнай салідарнасці Беларусі).
Сэрвіс запусціўся два месяцы таму. Ён дапамагае не толькі звычайным беларусам, але таксама стварае працоўныя месцы для лекараў, якія пацярпелі ад беларускага рэжыму. Два тыдні таму ў праекце налічвалі 60 спецыялістаў.
На сайце таксама можна стварыць «карту здароўя» для падарожжаў – медычная інфармацыя будзе даступнай на 110 мовах.
АА belsat.eu