З самай раніцы з пастановай на ператрус сілавікі прыйшлі да юрыста праваабарончага цэнтру «Вясна» Уладзімера Лабковіча і сябры рады «Вясны» Валянціна Стэфановіча.
Уладзь Лабковіч паспеў сцісла паведаміць пра гэта ў сваім Facebook. «Ператрус», – напісаў ён.
Падрабязнасцяў пакуль няма.
Праваабарончы цэнтр «Вясна» паведамляе, што каля 9-й ранку супрацоўнікі ДФР прыйшлі з ператрусам да гарадзенскага праваабаронцы Віктара Сазонава.
А ў Менску затрымалі праваабаронцу Сяргея Сыса, у ягоным доме адбываецца ператрус. Затрыманая і праваабаронца Яўгенія Бабаева. Яе павезлі ў Следчы камітэт.
Таксама адсутнічае сувязь са старшынём Праваабарончага цэнтру «Вясна» Алесем Бяляцкім.
Ператрус адбываецца і ў дырэктара праваабарончай арганізацыі «Lawtrend» Вольгі Смалянкі. Пра гэта яна паведаміла на сваёй старонцы ў Facebook. Вольга дадала, што чакаецца ператрус і ў офісе арганізацыі.
Скончыўся ператрус у праваабронцы і каардынатара кампаніі «Праваабаронцы супраць смяротнага пакарання» Андрэя Палуды. Яго затрымалі і вязуць на пляцоўку «Тэрыторыя правоў», дзе таксама адбудзецца вобшук.
У офіс БАЖ таксама прыйшлі сілавікі. Яны выламалі дзверы.
Вобшук у офісе руху «За свабоду» ў Менску, напісаў у сваім Facebook старшыня арганізацыі Юрась Губарэвіч.
Сілавікі прыйшлі і ў офіс выдання «Имена».
«У офісе «Имён» нейкія людзі, імаверна, ДФР. Больш нічога сказаць не магу», – напісала ў Facebook стваральніца праекту Кацярына Сінюк.
Ператрус адбываецца ў офісе Згуртавання беларусаў свету «Бацькаўшчына».
Таксама выломваюць дзверы ў офісе Беларускага Хельсінкскага камітэту. Пра гэта напісаў у сваім Facebook старшыня праваабарончай арганізацыі Алег Гулак.
Прыйшлі з ператрусам да Мікалая Шараха, кіраўніка полацкай філіі Свабоднага прафзвязу і сябры Полацкага праваабарончага таварыства.
Таксама ператрус адбываецца ў Берасці ў Кірыла Кафанава, праваабаронцы з арганізацыі «Human Constanta».
У офісы цэнтра эканамічных даследаванняў «BEROC», праваабарончай арганізацыі «Гендерные перспективы» і партыі БНФ таксама прыйшлі сілавікі.
У Барысаве затрыманы юрыст і праваабаронца Алег Мацкевіч. Яго павезлі ў Следчы камітэт у Менск.
Таксама сёння ў 7:30 раніцы прайшоў ператрус у праваабаронцы «Вясны» Алены Лапцёнак. У пастанове на ператрус значыліся: ч.1 і 2 арт. 342 і ч. 2 арт. 243 Крымінальнага кодэкса. Алену павезлі ў Следчы камітэт. Невядома, у якім яна статусе.
Ператрус праходзіць і ў эканаміста Яраслава Раманчука.
У Горадні з вобшукам прыйшлі ў ГА «Цэнтр «Трэці сектар» і арганізацыю «Офіс еўрапейскай экспертызы і камунікацыі» у Менску.
Сілавікі зладзілі ператрус у офісе Саюза беларускіх пісьменнікаў. Па стане на 14.43 ператрус завершылі. Офіс апячаталі і канфіскавалі тэхніку.
Ператрус таксама зладзілі і ў кватэры старшыні СБП Барыса Пятровіча. Ён цяпер на волі пад падпіскай пра неразгалошванне і нявыездзе.
Сілавікі прыйшлі і да сябраў грамадскага аб’яднання «Фонд імя Льва Сапегі», паведамляе праваабарончы цэнтр «Вясна».
Пасля ператрусу затрымалі праваабаронцу «Вясны» Уладзіміра Лабковіча і яго жонку Ніну Лабковіч – выканаўчага дырэктара аб’яднання інвестараў «Angels Band».
Адбыўся ператрус у старшыні праўлення адукацыйнага цэнтра «ПОСТ» Сафіі Емельянавай. У яе, акрамя кампутара і тэлефона, забралі зборнік апавяданняў выдавецтва «Наша Ніва»: «Жанчыны выходзяць з-пад кантролю».
Сілавікі прыйшлі з ператрусам да Анатоля Лябедзькі.
Анатоль Лябедзька пакуль на волі. Падчас ператрусу вынялі сцягі, тэхніку.
А 18:00 стала вядома, што кіраўнік праваабарончага цэнтру «Вясна» Алесь Бяляцкі затрыманы. Крымінальную справу супраць яго вядзе Цэнтральны апарат Следчага камітэту. Падрабязнасці высвятляюцца.️ Сувязі з Алесем Бяляцкім не было з самай раніцы, піша «Вясна».
У дырэктаркі SYMPA/BIPART (Школа маладых менеджараў публічнага адміністравання) Наталлі Рабавай кватэра апячатаная, адзнака ДФР.
Праваабаронца з Горадні Віктар Сазонаў у ІЧУ Кастрычніцкага РАУС. Праваабаронцу затрымалі на 72 гадзіны.
Журналіст праваабарончага цэнтру «Вясна» Сяржук Сыс затрыманы на 72 гадзіны ў межах крымінальнай справы. Сястра яго жонкі паведамляе, што падчас ператрусу хату «разграмілі».
АД, belast.eu