У Берасці 40-гадовая жанчына атруцілася невядомым газам. Медыкі, якія прыехалі яе ратаваць, таксама знепрытомнелі, паведамляе Следчы камітэт.
Жанчына працавала ў памяшканні каналізацыйнай помпавай станцыі, размешчанай на тэрыторыі Берасцейскага абласнога клінічнага шпіталю. Каля 19-й гадзіны калегі не змаглі з ёй звязацца. Тады адзін з працаўнікоў накіраваўся ў працоўнае памяшканне жанчыны, дзе пабачыў яе без прытомнасці і звярнуўся па дапамогу да медыкаў.
Лекары, якія прыбылі па выкліку, таксама страцілі прытомнасць, надаючы дапамогу ў памяшканні станцыі. Ратавальнікі вынеслі з каналізацыйнай станцыі ўсіх пацярпелых. Атручаных шпіталізавалі. Нягледзячы на рэанімацыйныя захады працаўніца помпавай станцыі памерла.
Папярэдняя прычына гібелі – уцечка невядомага атрутнага газу. Па дадзеным факце праводзіцца правяранне.
АД, belsat.eu
