Святлана Ціханоўская пракаментавала напады сілавікоў на праваабаронцаў, журналістаў і НДА
Святлана Ціханоўская заявіла, што праваабарончыя арганізацыі ў Беларусі шмат гадоў добрасумленна рабілі не толькі сваю, але і выконвалі працу за дзяржаву. Менавіта праваабаронцы і НДА дапамагалі людзям з інваліднасцю, рэгіянальным актывістам, бізнесу.
Экс-кандыдатка на прэзідэнцтва Святлана Ціханоўская нагадвае, што менавіта недзяржаўны сектар займаўся працай, якую мусіла рабіць дзяржава. А цяпер рэжым помсціць тым, без каго яго існаванне скончыцца яшчэ хутчэй.
«Рэжым хавае адсутнасць кантролю над гвалтам і беззаконнем. Яго саўдзельнікі ўжо пагражалі грамадзянскай супольнасці ў адказ на санкцыі – яны спадзяюцца, што змогуць зноў адчуць сілу, калі ў краіне ўсё замаўчаць. Але праваабаронцы, актывісты і журналісты дакладна ведаюць: сіла – у праўдзе, а ўлада – у руках народу», – заявіла Святлана Ціханоўская.
«Я не раз сустракала Алеся Бяляцкага – ён шмат гадоў змагаецца за правы чалавека ў Беларусі. Ён сам быў палітвязнем, але, нягледзячы на рэпрэсіі, у вачах гэтага чалавека – жалезная ўпэўненасць у тым, што мы, беларусы, усё робім правільна. І мы не сыдземся са свайго шляху, бо раней такіх людзей у нашай краіне былі адзінкі. А цяпер – мільёны».
СК belsat.eu
