Намесніца міністра абароны Украіны Ганна Маляр падчас тэлевізійнага марафону распавяла, колькі зброі перадалі заходнія партнёры. Маляр заявіла, што пакуль Украіна атрымала толькі 10 % абяцанага ўзбраення.
Ганна Маляр адзначыла, што праз колькасную перавагу расейскага войска Украіна не можа паўнавартасна весці вайну без дапамогі заходніх партнёраў.
«Колькі б намаганняў ні прыкладала Украіна, якой бы прафесійнай ні была нашая армія, без дапамогі партнёраў мы не зможам выйграць гэтую вайну. Ад таго, што заяўляла Украіна, з таго, што нам трэба, мы атрымалі каля 10 %», – сцвярджае Маляр.
Яна падкрэсліла, што Захад мусіць паскорыць аказанне ваеннай дапамогі Украіне, бо кожны дзень прамаруджвання вымяраецца жыццямі ўкраінскіх байцоў, цывільнага насельніцтва і разбуранымі ўкраінскімі гарадамі.
Таксама Маляр паведаміла, што ў ЗСУ з канца лютага былі мабілізаваныя сотні тысяч асобаў. Канкрэтнай лічбы яна не агучыла.
Нагадаем, што два дні таму выданне «Speigel» паведаміла, што нямецкі ўрад забараніў уладам Іспаніі перадаць Украіне 40 танкаў «Leopard 2A4».
Раман Лугоўскі belsat.eu
