Суд не задаволіў скаргі віцяблянак, якіх затрымалі ўзімку падчас скандынаўскай хады
Віцебскі абласны суд не задаволіў скаргі шасці віцяблянак на рашэнне суда Першамайскага раёну.
Жанчыны скардзіліся на дзеянні намесніка начальніка аддзелу міліцыі Першамайскага раёну падпалкоўніка Івана Доўгага.
У сярэдзіне студзеня супрацоўнікі міліцыі затрымалі ў лесе шэсць жанчын: Людмілу Валадкевіч, Тамару Ільіну, Людмілу Камінскую, Алену Каснову, Раісу Кухту і Таццяну Севярынец, калі тыя выйшлі папрактыкавацца ў скандынаўскай хадзе.
Супрацоўнікі міліцыі палічылі заняткі спортам несанкцыянаваным мерапрыемствам.
Віцяблянак пратрымалі ў пастарунку 8 гадзінаў без ежы і магчымасці прыняць лекі. А пасля ўсіх іх – акрамя Таццяны Севярынец – накіравалі на ноч да суда ў ізалятар часовага ўтрымання.
У выніку суд спыніў справы, а жанчыны падалі пазовы на незаконныя дзеянні супрацоўнікаў міліцыі: затрыманне і змяшчэнне ў ІЧУ. Суддзя Першамайскага раёну Віцебску Жанна Васільева адхіліла ўсе 6 скаргаў і ўсклала на віцяблянак абавязак заплаціць судовыя выдаткі – па 4 руб. 85 кап. з кожнай.
З такім рашэннем жанчыны не згадзіліся і падалі скаргі ў абласны суд. Аднак безвынікова, бо суддзі палічылі, што Першамайскі суд увогуле не меў кампетэнцыі разглядаць справу як грамадзянскую.
Віктар Старавойтаў, belsat.eu
