Наста Крывашэева, былая студэнтка МДЛУ, была адной з тых, да каго 12 лістапада прыйшлі супрацоўнікі КДБ. Тады адбылася аблава на студэнцкую супольнасць. Дзяўчыне ўдалося схавацца. Яна кажа, што пачувала сябе як дзяўчынка-габрэйка ў нацысцкай Германіі з фільму «Трусік Джоджо». Цяпер Наста знаходзіцца ў Варшаве, сумуе па блізкіх і ладзіць акцыі ў падтрымку затрыманых па “справе студэнтаў” і іншых палітвязняў.
Мы пагутарылі з Настай пра затрыманне яе сяброў, пераслед сілавікамі і вымушаную эміграцыю.
За тыдзень да «чорнага чацвярга» – так актывісты называюць 12 лістапада, Наста выйшла з Акрэсціна пасля содняў. У ізалятары з ёй праводзілі допыты, спрабавалі даведацца, хто арганізатар студэнцкіх акцыяў пратэсту. Але пасля прызначанага тэрміну – адпусцілі.
Першыя трывожныя паведамлення ў «чорны чацвер» сталі прыходзіць калі Наста знаходзілася ва ўніверсітэце. У той дзень яе наяўнасцю на парах цікавілася адміністрацыя.
«Памятаю, як пачалі прыходзіць паведамленні, што хтосьці заўважыў каля дома бусы, а камусьці ўжо пазванілі ў дзверы. Але адчування, што зараз адбываецца нешта настолькі важнае і значымае, – не было».
Пасля заняткаў, калі Наста спускалася за паліто, зʼявілася інфармацыя, што да двух студэнтак прыйшлі з ператрусам у інтэрнат. Тады дзяўчына зразумела, што адбываецца нешта нядобрае.
Ведаючы, што ў пэўны момант за актыўнымі студэнтамі могуць прыйсці, яны пазначылі для сябе «чырвоную лінію», якая азначала «усё, мы не ў бяспецы і за намі хутка прыйдуць». Такой мяжой быў ператрус у Аланы Гебрэмарыям.
«І вось мы даведаліся, што ў кватэры Аланы выламалі дзверы. Хоць тады яшчэ было невядома: гэта да яе ці не, мы зразумелі, што трэба нешта рабіць. Я чытала паведамленні і не магла спыніцца, не магла схадзіць за курткай. У мяне трэсліся рукі, але з-за такога адрэналіну я заставалася спакойнай і цвярозай, у мяне не было панікі.
Я ўзяла паліто і проста села на лаўку чытаць паведамленні далей, думала, што мне рабіць. Пасля выйшла з універсітэту і пайшла на метро з думкай, што наўрад ці мяне прама там будуць затрымліваць. Адтуль патэлефанавала маме, сказала, што больш не буду даступная і дастала сімку з тэлефона».
Пасля ўніверсітэту Наста паехала да бабулі на кватэру: яна планавала ў падобным выпадку хавацца ў пустой кватэры яе суседкі.
Разам з бабуляй жыве яе сын з жонкай і двума дочкамі. «Яны яшчэ тады здзівіліся, што я гарбаты з імі не папʼю», успамінае дзяўчына.
Бабуля Насты ўзяла ключы, і разам яны зайшлі ў кватэру суседкі насупраць.
«Бабуля на гэтай кватэры яблыкі сушыць. Яна паказала мне ўсё там і вярнулася ў сваю кватэру па акуляры, каб перабраць гэтыя яблыкі. Тады я захацела захаваць усё, што адбываецца, запомніць кожную дэталь таго дня і запісала ў нататніку: «Маіх сяброў забраў КДБ».
Пакуль жанчына пайшла па акуляры, Насця ўключыла тэлевізар, але не змагла глядзець навіны. Пераключыла на мульцікі, каб неяк адключыцца ад таго, што адбываецца.
«Праз мульцікі я пачула ў бабулінай кватэры мужчынскія галасы, якіх там не павінна быць. Адразу зразумела, хто гэта. Бабуля яшчэ называла іх хлопчыкамі. Нас падзялялі толькі дзверы, якія нават не былі цалкам зачыненыя. Я не магла паглядзець, што там адбываецца, нават паварушыцца не магла, проста замерла. Зразумелая справа, навошта яны туды прыйшлі».
Той момант, як сілавікі зайшлі ў кватэру да бабулі, Наста не чула. Яна згадвае галасы, як нехта настойліва казаў, што яны дакладна бачылі, як дзяўчына зайшла ў падʼезд і што ёй проста няма дзе быць.
Пасля сыходу сілавікоў Наста падышла да акна, кватэра суседкі была на першым паверсе. «Іх бус без нумароў стаяў лабавым шклом на мяне. Я баялася падысці да акна, нават хадзіць па кватэры, і проста легла на падлогу. Потым пабачыла, што бабулін тэлефон застаўся ў мяне: падключылася да інтэрнэту, усталявала ёй тэлеграм, напісала маме і знаёмай, што я ўсё яшчэ на свабодзе».
Мікрааўтобус з сілавікамі стаяў пад домам усю ноч, а яго фары свяцілі прама ў акно кватэры, дзе хавалася студэнтка. Раніцай яны пачалі правяраць падʼезд, хадзіць па паверхах, упэўніныя што Наста недзе там. Пасля гэтага зʼездзілі да бацькоў дзяўчыны і вярнуліся.
У бацькоў ператрусу не было: яны не адкрылі дзверы і некалькі дзён не ўключалі святло і тэлевізар. Але іх акаунты тэлеграму спрабавалі ўзламаць.
«У мяне было такое адчуванне, што я дзяўчынка-габрэйка з фільму «Трусік Джоджо», якая хавалася ў сцяне аднаго з дамоў у нацысцкай Германіі», – распавядае Наста.
Так дзяўчына пражыла тры дні: без святла, мабільнай сувязі і бяспекі. Да таго ж на самой кватэры акрамя сушаных яблыкаў нічога не было. Бабуля прыносіла ежу: адкрывала сваімі ключамі дзверы і сыходзіла.
«Было не зусім зразумела, што рабіць далей. Можна было жыць у гэтай закрытай кватэры або зʼехаць у вёску і жыць наогул без сувязі. Ці зʼехаць з краіны. Да гэтага я была ўпэўненая, што няма сілы, здольнай выпхнуць мяне з Беларусі».
Дзяўчына павінна была вырашыць, што рабіць. З сабой у яе наогул нічога не было, ні пашпарта, ні грошай, нічога. Былі толькі падручнікі па італьянскаму, якія засталіся пасля пар. На трэція содні пашпарт і чысты ноўтбук усё ж такі прывезлі.
«Я паглядзела, што ў двары няма мікрааўтобусаў і вырашыла, што трэба ехаць. Пераапранулася ў зусім чужыя рэчы і выйшла з падʼезду, а ноччу была ўжо на мяжы з Украінаю. Праверылі са знаёмым мой статус: усё яшчэ выязная».
Насця выйшла перад беларускай мяжой, і пешшу пайшла да беларускага пагранічнага пункта пропуска. На вуліцы ішоў дождж, а на мяжы стаялі адны фуры.
«Як толькі памежнікі пачалі правяраць мае дакументы – у іх зʼявіліся пытанні, сталі абмяркоўваць нешта. Сказалі, што ў базе нейкая праблема і да мяне прыйдзе начальнік. Але мне ўжо было ўсё роўна. Павялі ў нейкі кабінет для поўнага дагляду, разабралі кашалёк на часткі, дасталі ўсе, расклалі ўсе чэкі, карткі. Выклалі ўсё на стол як на фотаздымках следчага камітэту.
У падшэўцы знайшлі нейкія партызанскія налепкі, пра якія я і забылася. Вось тады ўсё ўпала ўнутры. Яшчэ адсканавалі ўсе старонкі нататніку, пералічылі грошы, якія ў мяне былі з сабою, каля 100 еўра».
Увесь агляд заняў каля трох гадзін. Але дзяўчыну ўсё ж такі адпусцілі, сказалі проста – «ідзі».
«У буфернай зоне паміж Беларуссю і Украінай нават паветра падалося не такім напружаным. Патэлефанавала маме, супакоіла яе і пайшла да ўкраінскай мяжы. Там былі свае праблемы са страхоўкай, але я ўжо адчувала ў сабе столькі сілы справіцца з любой задачай, што ад такіх «складанасцяў» было нават смешна».
Пасля праходжання ўкраінскай мяжы Наста злавіла машыну: трансфер з Менску ў аэрапорт Барыспаля. Кіроўца апынуўся беларусам і прапанаваў паесці. «Я тады ўпершыню адчула сябе ў бяспецы. Мы з ім разгаварыліся, я распавяла, што бегла ад крымінальнага артыкула, а ён дастаў з сумкі плакаты Ціханоўскай, Цапкалы, Бабарыкі, потым паказаў, якую ён акцыю рабіў. Па выніку нават з мяне ніякіх грошай не ўзяў».
Дабраўшыся да Кіева, дзяўчына паехала ў хостэл да знаёмых студэнтаў: некаторыя з іх даўно там жылі, а хтосьці таксама збег пасля 12 лістапада.
«Увечары ў нумары мы абмяркоўвалі тое, што адбылося ў «чорны чацвер», памятаю, тады яшчэ ішоў стрым Андрэевай і Чульцовой з Плошчы пераменаў. Я ўжо потым стала абдумваць тое, што адбылося. Калі тваё жыцця за пару гадзін цалкам змяняецца, ты атрымліваеш даволі моцны стрэс і прайсці праз яго, не змяніўшыся, не атрымаецца».
Неўзабаве Наста знайшла працу і пасялілася ў інтэрнаце за горадам, дзе жывуць перасяленцы з Данбасу. Але праз дазволеныя паўгода ва Украіне, пераехала ў Варшаву. Зараз працуе і збірае дакументы для паступлення ва ўніверсітэт.
«Цяпер жыццё зусім не тое, што раней, калі я была ў Беларусі. Адразу згубіўся велізарны яго кавалак, а дакладней, частка сэнсу. Але калі шчыра, усё гэта – чарговыя задачы і я ведаю, што спраўлюся з усім. Толькі перажываю, што не магу забраць сваіх сяброў з СІЗА – ад гэтага вельмі балюча. З таго часу я адчуваю віну за тое, што на волі і не змагла выратаваць астатніх. Але дзяржаве было ўсё роўна: пасадзіць нас або выслаць за мяжу. Яна проста паказала, што можа зрабіць гэта».
АД, belsat.eu