Галоўнае за 14 чэрвеня. З'яўленне Пратасевіча на брыфінгу і саміт NATO ў Бруселі
Belsat.eu падводзіць вынікі 14 чэрвеня – 310-га дня супрацьстаяння грамадства і ўладаў.
Рамана Пратасевіча прывялі на брыфінг МЗС
14 чэрвеня адбыўся брыфінг МЗС аб перахопе самалёта «Ryanair». Таксама на яго нечакана прывялі Рамана Пратасевіча, якога затрымалі ў выніку пасадкі самалёту ў Менску.
На ім Пратасевіч заявіў, што пачуваецца выдатна і ў яго выдатны настрой, ён не мае ніякіх скаргаў. Паводле яго, сляды на ягоных руках, якія раней былі заўважаныя на прапагандысцкім відэа ОНТ, гэта «сляды ад сцяжак, бо затрыманне было нечаканым, у супрацоўнікаў не было кайданкаў». Пратасевіч тройчы паўтарыў, што пачуваецца выдатна і нават гатовы прайсці любую незалежную экспертызу.
«Сябры, я адчуваю сябе выдатна, у мяне няма ні на што скаргаў, ніхто мяне не біў. Не распаўсюджвайце далейшых чутак. Сапраўднымі закладнікамі сітуацыі стала Сафія і мае бацькі, якія знаходзяцца ў Польшчы ў стане інфармацыйнага вакууму… Маіх бацькоў папросту выкарыстоўваюць, за іх спінамі стаяць канкрэтныя палітычныя дзеячы… Я больш чым упэўнены, што мае бацькі могуць бяспечна вярнуцца дадому», – заявіў ён.
Аднак акрамя з’яўлення Пратасевіча брыфінг запомніўся яшчэ і дыялогам паміж ім і журналісткай БелаПАН Таццянай Каравянковай. Асноўная частка пытанняў падчас прэс-канферэнцыі была зададзена менавіта Раману Пратасевічу.
Пасля некалькіх пытанняў журналістаў Раман пацікавіўся ў залі, ці вераць яны ягоным словам. Першапачаткова зала прамаўчала, але пасля Таццяна адказала Пратасевічу, што не верыць яму і дадала:
«Мне цяжка ўявіць, што вы перажылі за апошнія тыдні. Я шчыра вам спачуваю. Вам гэтак жа шчыра спачуваюць многія людзі ў Беларусі і многія вашыя калегі. Усяму, што вы кажаце, я не веру. Бо магу меркаваць, што з вамі маглі зрабіць. Проста трымайцеся і перажывіце гэта».
На дзяўчыну Рамана Пратасевіча Соф’ю Сапегу, якая была затрымана разам з Раманам Пратасевічам, завялі новую крымінальную справу
Адвакат палітзняволенай распавёў, што ў Следчым камітэце яму далі азнаёміцца з дакументамі аб затрыманні Сапегі і распачынанні ў траўні яшчэ адной крымінальнай справы супраць яе.
Адвакат Аляксандр Філановіч распавёў, што Соф’я Сапега пачуваецца добра і падала скаргу ў суд на сваё затрыманне. Сёння, 14 чэрвеня, прайшло закрытае паседжанне ў гэтай справе ў судзе Партызанскага раёну Менску, у выніку якога суд не задаволіў скаргу дзяўчыны.
Гарадзенскага музыку выпраўляюць адбываць пакаранне ў Віцебск
Ігар Банцар – гарадзенскі актывіст і музыка, асуджаны на 1,5 года «хіміі» за пратэст. Адбываць пакаранне яго выпраўляюць у Віцебск, у папраўчую ўстанову адкрытага тыпу № 9, – з 17 чэрвеня.
Нагадаем: у сакавіку Банцар больш за два тыдні трымаў сухую галадоўку ў СІЗА.
ДАІ хоча ўзмацніць кантроль за кіроўцамі службаў таксі, якія працуюць праз мабільныя праграмы
Сталічныя супрацоўнікі ДАІ з 14 да 23 чэрвеня ўзмоцняць кантроль за таксі, выкліканыя праз праграмы «Яндекс.Такси», «Uber» і «Bolt».
Паводле інфармацыі ДАІ за пяць месяцаў гэтага года было выяўлена больш за 600 парушэнняў ПДР кіроўцамі сэрвісаў «Bolt», «Uber» і «Яндекс.Такси». З іх – восем фактаў кіравання аўтамабілем у стане алкагольнага ап’янення, сем – без правоў.
Па віне гэтай катэгорыі кіроўцаў адбылося сем ДТЗ, у якіх восем чалавек атрымалі раненні.
Арцыбіскуп Кандрусевіч звярнуўся да святога Антонія з просьбаю «пра вырашэнне беларускага крызісу»
У прамоўленым Божым слове ў касцёле Унебаўзяцця Найсвяцейшай Панны Марыі арцыбіскуп Кандрусевіч адзначыў, што ані пандэмія каронавіруса, ані сучасныя секулярныя тэндэнцыі, ані грамадска-палітычны крызіс у нашай бацькаўшчыне не могуць зацьміць узнёсласць свята ў гонар святога Антонія.
«Святы Антоній, які з’яўляецца апекуном у пошуку згубленых рэчаў, павінен стаць апекуном у пошуку і адраджэнні веры, якую сучасная секулярная культура губляе, але без якой немагчыма вырашыць нашы надзённыя праблемы. Да яго мы таксама звяртаемся сёння з просьбай аб спыненні пандэміі каронавірусу і аб вырашэнні беларускага крызісу», – дадаў арцыбіскуп Кандрусевіч.
Суд не задаволіў скаргі віцяблянак, якіх затрымалі ўзімку падчас скандынаўскай хады
У сярэдзіне студзеня супрацоўнікі міліцыі затрымалі ў лесе шэсць жанчын: Людмілу Валадкевіч, Тамару Ільіну, Людмілу Камінскую, Алену Каснову, Раісу Кухту і Таццяну Севярынец, калі тыя выйшлі папрактыкавацца ў скандынаўскай хадзе.
У выніку суд спыніў справы, а жанчыны падалі пазовы на незаконныя дзеянні супрацоўнікаў міліцыі: затрыманне і змяшчэнне ў ІЧУ. Суддзя Першамайскага раёну Віцебску Жанна Васільева адхіліла ўсе 6 скаргаў і ўсклала на віцяблянак абавязак заплаціць судовыя выдаткі – па 4 руб. 85 кап. з кожнай.
З такім рашэннем жанчыны не згадзіліся і падалі скаргі ў абласны суд. Аднак безвынікова, бо суддзі палічылі, што Першамайскі суд увогуле не меў кампетэнцыі разглядаць справу як грамадзянскую.
АД, belsat.eu
