Пенсіянера, слесара-сантэхніка ў БДУ Анатоля Пятрова прызналі вінаватым паводле арт. 342 КК («Актыўны ўдзел у групавых дзеяннях, якія груба парушаюць грамадскі парадак»). Суддзя пакарала пенсіянера 3 гадамі «хатняй хіміі», піша праваабарончы цэнтр «Вясна».
Жыхара Менску Анатоля Пятрова абвінавацілі ў тым, што 9 жніўня ён «прымаў удзел у групавых дзеяннях, якія груба парушаюць грамадскі парадак». Паводле следства, пенсіянер выкрыкваў правакацыйныя лозунгі, а таксама ўзяў пясок з клумбы і кінуў яго ў бок працаўнікоў МУС. Анатоль Пятроў, які працуе слесарам-сантэхнікам у БДУ, цалкам прызнаў віну і раскаяўся.
Мужчына патлумачыў, што зямлёй з клумбы ён не хацеў ні ў каго трапіць, гэта хутчэй быў дэманстратыўны жэст. Але дзяржаўная абвінаваўца патрабавала прысудзіць Пятрову 3 гады абмежавання волі без накіравання ва ўстанову адкрытага тыпу («хатняя хімія»).
Суддзя Юлія Густыр падтрымала пракурора і прысудзіла пенсіянеру 3 гады абмежавання волі без накіравання ва ўстанову адкрытага тыпу.
СК belsat.eu