У судзе Кастрычніцкага раёну Магілёва сёння, 14 красавіка агучылі прысуд блогерам Сяргею Пятрухіну і Аляксандру Кабанаву.
Суддзя Вольга Краўчанка прызнала блогераў вінаватымі ў арганізацыі і падрыхтоўцы дзеянняў, што груба парушаюць грамадскі парадак, альбо актыўны ўдзел у іх, і ў абразе прадстаўніка ўлады.
Паводле прысуду, Пятрухін пакараны 3 гадамі пазбаўлення волі ў калоніі агульнага рэжыму. Кабанава суддзя пакарала 3 гадамі ў калоніі агульнага рэжыму.
Акрамя таго, асуджаныя павінны аплаціць 1500 рублёў як кампенсацыю маральнай шкоды + 87 рублёў мыты.
Самі блогеры на судзе адсутнічалі. Суддзя палічыла, што прывозіць іх залішне, а дастаткова прадстаўнікоў іх абароны. Таму прысуд абвяшчаўся без іх.
Магілёўскі праваабаронца Уладзімір Шанцаў пракаментаваў прысуд блогерам Пятрухіну і Кабанаву як несправядлівы:
«Абодвух яшчэ на папярэдніх паседжаннях выдалілі з судовай залі, нібыта яны парушалі парадак. Але насамрэч яны пратэставалі супраць таго, што судовую залю запоўнілі невядомымі людзьмі і не пусцілі родных і журналістаў. Блогераў пазбавілі магчымасці выступіць з апошнім словам, на што яны маюць поўнае права, але ж у нас цяпер – часам не да законаў».
ММ belsat.eu