Лінія, якая сілкуе Чарнобыльскую АЭС і Славуціч, зноў пашкоджаная расейскімі войскамі пасля таго, як рамонтная брыгада «Укренерго» адрамантавала яе. Пра гэта 14 сакавіка паведамілі ва ўкраінскай кампаніі.
13 сакавіка працаўнікі «Укренерго» адрамантавалі высакавольтную лінію электраперадачы, якая сілкуе ЧАЭС і Славуціч. У 19.07 яе паставілі пад напружанне і пачалі аднаўленне энергасілкавання інфраструктуры станцыі і гораду. Але завяршыць працы не атрымалася, бо расейцы неўзабаве зноў пашкодзілі лінію.
Цяпер рамонтная брыгада «Укренерго» вымушана зноў ехаць на акупаваную тэрыторыю каля Чарнобыльскай АЭС, шукаць і ліквідаваць новае пашкоджанне, паведамілі ў кампаніі.
«Укренерго» адзначае, што Чарнобыльская АЭС з’яўляецца важным абʼектам, які не можа заставацца без надзейнага энергасілкавання. Таксама ад лініі, якая сілкуе атамную станцыю, залежыць электразабеспячэнне жыхароў Славуціча. Таму бесперашкодны і хуткі допуск рамонтных брыгад «Укренерго» да гэтай лініі для правядзення аглядаў і рамонтаў вельмі важны не толькі для ўкраінскіх спажыўцоў, але і для Еўропы ў цэлым», – адзначылі ў «Укренерго».
Паводле кампаніі, «гэта дапаможа пазбегнуць паўторнай катастрофы на Чарнобыльскай АЭС і захаваць жыццё і здароўе людзей, якія могуць стаць яго ахвярамі».
24 лютага Чарнобыльскую АЭС захапілі расейскія войскі. З таго часу на станцыі дзяжурыць адна і тая ж змена з 210 чалавек, сярод якіх тэхнічныя спецыялісты і ахоўнікі. Украінскія ўлады ўжо папрасілі Міжнароднае агенцтва па атамнай энергіі (МАГАТЭ) дапамагчы забяспечыць ратацыю персаналу Чарнобыльскай атамнай электрастанцыі.
ПС belsat.eu